“Qarabağ” Azərbaycan çempionu oldu – VİDEO

23.04.2018 - 10:33

“Qarabağ” klubu Azərbaycan Premyer Liqasının XXV turunda səfərdə “Sumqayıt”ın qonağı olub.

XəzərXəbər-in məlumatına görə, oyun qarşılıqlı hücumlar əsnasında başlayıb. Matçın 34-cü dəqiqəsində “Qarabağ” hesabı açıb. Dani Kintana cərimə zərbəsindən möhtəşəm qolla yadda qalıb.

İlk hissə “Qarabağ”ın 1:0 hesablı qələbəsiylə başa çatıb.

İkinci hissədə meydan sahibləri təzyiqi artırsa da, “Qarabağ” inamlı oyunuyla yadda qalıb və bu matçda 1:0 hesablı qələbə qazanıb.

“Qarabağ” bu qələbəylə xallarının sayını 59-a çatdıraraq ən yaxın izləyicisi “Qəbələ”ylə xal fərqini 17-yə çatdırıb. Sona IV tur qalmış”Qarabağ” ümumilikdə 6-cı, ardıcıl 5-ci çempionluğunu qazanıb. İlk dəfə 1993-cü ildə qızıl medallara yiyələnən ağdamlılar 2013/14, 2014/15, 2015/16, 2016/17 mövsümlərinin ardından 2017/18 mövsümündə də hamıdan güclü olub. Qurbanovun komandası həm də ardıcıl qızıl medal sayında öz rekordunu yeniləyib.

Qeyd edək ki, ümumilikdə 8 komanda qızıl medallara sahib olub və “Qarabağ” çempionluq sayında yalnız “Neftçi”dən geri qalır. Bakılılar 8, Ağdam klubu 6 dəfə yarışın qalibi olubsa, “Kəpəz”in 3, “Şəmkir”, “Keşlə” (“İnter” adlandığı vaxt) və “Bakı”nın hərəyə 2, “Turan”la “Xəzər Lənkəran”ın hərəyə 1 çempionluğu var.

Mövsüm	Çempion
1992	“Neftçi”
1993	“Qarabağ”
1993/94	“Turan”
1994/95	“Kəpəz”
1995/96	“Neftçi”
1996/97	“Neftçi”
1997/98	“Kəpəz”
1998/99	“Kəpəz”
1999/2000	“Şəmkir”
2000/01	“Şəmkir”
2001/02	yarımçıq qalıb
2002/03	Keçirilməyib
2003/04	“Neftçi”
2004/05	“Neftçi”
2005/06	“Bakı”
2006/07	“Xəzər Lənkəran”
2007/08	“İnter”
2008/09	“Bakı”
2009/10	“İnter”
2010/11	“Neftçi”
2011/12	“Neftçi”
2012/13	“Neftçi”
2013/14	“Qarabağ”
2014/15	“Qarabağ”
2015/16	“Qarabağ”
2016/17	“Qarabağ”
2017/18	“Qarabağ”

Eyni saatda start götürən “Neftçi” – “Qəbələ” görüşündə isə meydan sahibləri qalib gəlib. Ruslan Abışovun 4-cü dəqiqədə vurduğu qolla Azərbaycan Kubokunun yarımfinalında uduzduğu rəqibini üstələyən “ağ-qaralar” xallarını 37-yə çatdırıblar və “Zirə”ni keçərək, 4-cü pilləyə yüksəliblər.

İlk oyun günündə “Keşlə” “Zirə”ni 2:1 hesabı ilə məğlub edib. Bu gün baş tutmuş “Səbail” – “Kəpəz” qarşılaşmasında isə qalib müəyyənləşməyib.