Təzə bina ayrılan İlahiyyat İnstitundakı YENİLİKLƏR – AÇIQLAMA
10.09.2019 - 11:10
Xəbər verdiyimiz kimi, Dini Qurumlarla İş üzrə Dövlət Komitəsinin sədri Mübariz Qurbanlı bir neçə gün əvvəl mediaya açıqlamasında bildirib ki, Azərbaycan Prezidenti İlham Əliyevin göstərişi ilə Azərbaycan İlahiyyat İnstitutu üçün bina ayrılıb və 4 mərtəbəli olan binada hazırda təmir işləri gedir.
Bununla bağlı Lent.az-ın sorğusuna cavab olaraq İlahiyyat İnstitutunun mətbuat xidmətindən bildirilib ki, Azərbaycan Respublikası Nazirlər Kabinetinin 477s saylı 6 iyul 2018-ci il tarixli sərəncamı ilə Azərbaycan İlahiyyat İnstitutuna yeni bina ayrılıb:
“Bakı şəhəri, Yasamal rayonu, Məhəmməd Naxçıvani küçəsində yerləşən bu tədris korpusunda hazırda təmir və yenidənqurma işləri aparılır. Dörd mərtəbədən ibarət olan binaya bir mərtəbənin də əlavə olunması nəzərdə tutulub. Bina 2020-2021-ci tədris ilində təhvil veriləcək.
Ali təhsil müəssisəsinin yeni korpusu bütün zəruri avadanlıqlarla, müasir texnologiyalarla tam təmin olunacaq. Təmir işləri yekunlaşdıqdan sonra isə İnstitut yeni ünvana köçəcək”.
Məlumatda bildirilib ki, ödənişsiz əsaslarla tələbə qəbulu həyata keçirən ali təhsil müəssisəsi Prezident İlham Əliyevin diqqət və qayğısı ilə tam əhatə olunub. Tələbələrə yüksək biliklərin verilməsi, onların fərdi bacarıqlarının artırılması üçün İnstitutda bütün zəruri şərait yaradılıb.
Xatırladaq ki, Azərbaycan İlahiyyat İnstitutu Respublika Prezidenti cənab İlham Əliyevin 9 fevral 2018-ci il Sərəncamı ilə yaradılıb. Sərəncamda göstərilən müddəalardan biri də ali təhsil müəssisəsinin bina ilə təmin olunmasıdır.
Short URL: http://www.cumhuriyyet.net/?p=132761
