«ABŞ GƏMİSİ SƏHVƏN ÖZ «DRON»UNU VURA BİLƏRDİ» – “Bütün pilotsuz uçaqlar bazaya qayıdıblar”

İran İslam Respublikası (İİR) xarici işlər nazirinin müavini Abbas Araqçı iyulun 19-da bəyan edib ki, Amerika Birləşmiş Ştatları (ABŞ) hərbi-dəniz qüvvələrinin (HDQ) gəmisi Hörmüz boğazında səhvən ABŞ pilotsuz uçağını vura bilərdi.

Onun sözlərinə görə, İran Hörmüz boğazında və ya haradasa başqa yerdə heç bir pilotsuz uçağını itirməyib. «Məni narahat edən odur ki, ABŞ HDQ-nin gəmisi səhv edərək, öz pilotsuz uçağını vurub» – deyə, Araqçı öz «Tvitter»ində yazıb.

Bu arada İran silahlı qüvvələrinin nümayəndəsi Əbülfəzl Şəkərçi də bəyan edib ki, ABŞ-ın bəyanatına baxmayaraq, Fars körfəzində və Hörmüz boğazında İrana məxsus bütün pilotsuz uçaqlar öz bazalarına qayıdıblar.

Bundan əvvəl isə İranın xarici işlər naziri Cavad Zərif bəyan edib ki, pilotsuz uçağın itirilməsi barədə Tehranın məlumatı yoxdur.

Məlumat üçün bildirək ki, iyulun 18-də ABŞ rəsmi şəxsləri xəbər vermişdilər ki, ABŞ HDQ-nin universal «Bokser» gəmisi İranın pilotsuz uçağını vurub.

Pentaqonun versiyasına görə, «Bokser»in ekipajı müdafiə məqsədilə, pilotsuz hava sisteminə hücum edib və onu vurub.
İran «dron»unun vurulması barədə jurnalistlərə ilk məlumatı ABŞ prezidenti Donald Tramp Ağ Evdə keçirilən mətbuat konfransında xəbər verib. (AzPolitika.info)

Short URL: http://www.cumhuriyyet.net/?p=129897