Assanj, Menninq və Snouden Nobel mükafatına namizəd göstərildi

Nobel Sülh Mükafatı laureatı Meyrid Korriqan Culian Assanjı, Çelsi Menninq və Eduard Snoudeni bu mükafata namizəd göstərib.

Azvision.az xəbər verir ki, bununla bağlı o, Nobel Komitəsinə məktub ünvanlayıb.

Korriqan qeyd edib ki, bu şəxsləri bir araya gətirməyinin səbəbləri sadədir: “Onlar ayrılıqda hakimiyyətlərin qanunsuz hərəkətlərini ifşa edən saysız cəsarət nümunələri göstərdilər Və birlikdə öz fədakarlıqları ilə insan ruhunun böyüklüyünü nümayiş etdirdilər”.

Korriqan, Assanjın Britaniya həbsxanasında saxlandığını, məhkəmənin onun ABŞ-a ekstradisiyasını rədd etməsinə baxmayaraq, bu riskin qaldığını xatırladıb. Onun sözlərinə görə, Assanj ABŞ-da “qəddar, alçaldıcı və insanlıqdan kənar davranışa” məruz qala, hətta edam cəzasına məhkum edilə bilər.

Çelsi Menninq Assanja məlumat ötürməkdə günahlandırılıb və ona qarşı ifadə verməkdən imtina etdiyi üçün yeddi il ABŞ həbsxanasında cəza çəkib. Keçmiş prezident Barak Obama tərəfindən əfv olunub.

ABŞ kəşfiyyat xidmətinin genişmiqyaslı gizli izləmə proqramlarını aşkarlayan Snouden Rusiyaya sığınıb və onu ömürlük həbs cəzası gözlədiyindən vətəninə dönə bilmir.

Nobel mükafatçısı deyib ki, onların hər üçü vicdanlarının səsi ilə vəzifələrini sevgi ilə yerinə yetirdilər.

Xatırladaq ki, Korriqan 1976-cı il Nobel mükafatını Şimali İrlandiyadakı münaqişənin nizamlanmasına görə alıb. O, Betti Uillyamsla birlikdə münaqişəyə son qoymağa çalışan təşkilat yaradıb.

Short URL: http://www.cumhuriyyet.net/?p=159275