Bu məsciddə koronavirus xəstələri üçün pulsuz oksigen konsentratorları paylanır…-İBRƏTAMİZ
29.10.2021 - 11:06
Krım yarımadasındakı Beloqorsk(əsl tarixi adı Qarasubazar) şəhərinin sahibkarları xüsusi müalicəyə ehtiyacı olan koronavirus xəstələri üçün oksigen konsentratorları alıblar. Hazırda tibbi avadanlıqlar şəhərin Refət Vəliullah adına mərkəzi məscidindədir.
Krım Müsəlmanları Ruhani İdarəsinin mətbuat xidmətinin yaydığı məlumata görə, bunu yerli dini icmanın sədri Ablyakim Azizov bildirib.
Müsəlman din xadimi oksigen konsentratorlarının Beloqorsk rayonunun sahibkarları və dini icmanın vəsaiti hesabına alındığını qeyd edib. Konsentratorlar oksigen çatışmazlığından əziyyət çəkən koronavirus və digər xəstəliklərə düçar olmuş insanlara xəstəlik müddətində müvəqqəti istifadə üçün pulsuz paylanacaq.
“Vəziyyət ağırdır, bütöv ailələr xəstədir. Bildiyiniz kimi, virus oksigen çatışmazlığına səbəb olur. Sahibkarlarımız və yerli ictimaiyyət ehtiyacı olanlara kömək etməyə çalışır” – deyə Ablyakim Azizov vurğulayıb.
Short URL: http://www.cumhuriyyet.net/?p=167921
