ABŞ-la İran arasında yaxın gələcəkdə məhbus mübadiləsi ola bilər
ABŞ İran məsələsində ciddidirsə, yaxın gələcəkdə məhbus mübadiləsinin şahidi ola bilərik.
Cumhuriyyet.net xəbər verir ki, bu barədə İran Xarici İşlər Nazirliyinin sözçüsü Nasir Kənani mətbuat konfransında deyib.
“Əsirlərin dəyişdirilməsi ilə bağlı vasitəçilər vasitəsilə aparılan danışıqların nəticələrini gözləyirik”, – o qeyd edib.
Kənani mümkün nüvə sazişi ilə bağlı xəbərlərə də münasibət bildirib: “Hərtərəfli Birgə Fəaliyyət Planı və nüvə danışıqları prosesi ilə bağlı mövqeyimiz aydındır. İran heç vaxt danışıqlar masasını tərk etməyib və hər zaman ciddi hazırlığını nümayiş etdirib. Hökumət sanksiyaların aradan qaldırılmasına yönəlmiş diplomatik prosesləri heç vaxt dayandırmayıb”.
Sözçü Oman vasitəsilə baş tutan İran-ABŞ danışıqlarının gizli olmadığını deyib: “Omanda ABŞ tərəfi ilə bir neçə həftə əvvəl danışıqlar apardıq”.
Kənani qeyd edib ki, İran Hərtərəfli Birgə Fəaliyyət Planını əvəz etmək üçün müvəqqəti saziş və ya yeni razılaşmalar üzrə danışıqları təsdiq etmir.
Short URL: http://www.cumhuriyyet.net/?p=192174
