ABŞ-a məxsus F-16 dənizə düşdü: 1 ildə eyni bölgədə 4-cü şübhəli qəza…
ABŞ-a məxsus F-16 qırıcı təyyarəsi Cənubi Koreyanın qərb sahillərində Sarı dənizə düşüb.
Mia.az xarici mətbuata istinadla xəbər verir ki, ABŞ Hərbi Hava Qüvvələrindən verilən açıqlamada Cənubi Koreyanın paytaxtı Seuldan təxminən 180 kilometr cənubda Kunsan Hava Bazasında yerləşən 8-ci Hava Donanmasına aid F-16 döyüş təyyarəsi Sarı dəniz üzərində fövqəladə vəziyyətlə qarşılaşıb. Belə ki, F-16 yerli vaxtla saat 08.41-də qəzaya uğrayıb.
Məlumaat görə, özünü təyyarədən atmağı bacaran pilot Cənubi Koreya və ABŞ-ın birgə fəaliyyəti ilə saat 09.30 radələrində xilas edilib: “Onun hazırda səhhəti yaxşıdır. Qəzanın səbəblərini müəyyən etmək üçün ətraflı araşdırmalara başlanılıb”. Xatırladaq ki, keçən dekabr ayında da ABŞ-ın 8-ci Hava Donanmasına məxsus F-16 adi təlim zamanı Sarı dənizə düşüb.
Ötən ilin may ayında isə ABŞ-ın 51-ci Hava Donanmasına məxsus F-16 təyyarəsi Seulun cənubundakı Osan aviabazasının yaxınlığında qəzaya uğramışdı. Hər iki qəzada özlərini təyyarədən atan pilotlar xilas ola biliblər. Bundan başqa, ötən ilin noyabrında Yaponiyada təyyarə qəzasında 8 ABŞ əsgəri həlak olub. Osprey tipli hərbi təyyarənin Yakuşima adasında sulara düşdüyü və 8 ekipaj üzvünün hamısının öldüyü açıqlanıb.
Short URL: http://www.cumhuriyyet.net/?p=198255
