Caynağı Azərbaycana da çatan 1 nömrəli narkobaron ikinci dəfə həbsdən qaçdı
Dünyanın bir nömrəli narkobaronu, 2014-cü ilin əvvəllərində ABŞ xüsusi xidmət orqanlarının da dəstəyi ilə Meksika dəniz piyadalarının keçirdiyi əməliyyatda həbs olunan “El Çapo” (Hoakin Qusman) saxlanıldığı sərt rejimli həbsxanadan qaçıb.
Virtualaz.org saytı xəbər verir ki, bu barədə az əvvəl Meksikanın Milli Təhlükəsizlik Komissiyasının yaydığı xüsusi bəyanatda deyilir. Bu, “El Çapo”nun karyerası boyu sərt rejimli həbsxanadan ikinci qaçışıdır.
Bəyanatda deyilir ki, “Sinaloa” narkokartelinin başçısı olan H.Qusman Mexiko yaxınlığındakı xüsusi rejimli həbsxanadan şənbə günü axşam saat 9 radələrində qaçıb. Onu sonuncu dəfə həbsxananın videomüşahidə kameralarında duş qəbul etməyə hazırlaşarkən görüblər. Bundan sonra Qusman bir müddət videomüşahidə kameralarında görünməyib. Həbsxana personalı onun kamerasını yoxlayıb və məlum olub ki, Qusman artıq yoxdur.
Qusmanın həbsxanadan qaçdığı məlum olan kimi onun axtarışı üçün qüvvələr səfərbər olunub, avtomobil yolları bağlanıb. Qonşuluqdakı Toluka aeroportundan uçuşlar dayandırılıb.
Lakin axtarışlar heç bir nəticə verməyib və onun izinə hələlik düşmək mümkün olmayıb. Qusman ilk dəfə ciddi rejimli Meksika həbsxanasından 2001-ci ildə nəzarətçilərin köməyi ilə qaçmışdı.
ABŞ-ın Federal Xəzinadarlıq Sistemi bir vaxtlar Qusmanın “dünyanın ən güclü narkobaronu” olduğunu bildirib. Onun şöhrətinin məşhur kolumbiyalı narkobaron Pablo Eskobarın şöhrətini də ötüb keçdiyi məlumdur.
Qeyd edək ki, “El Çapo”nun başçılıq etdiyi qanlı “Sinaloa” kartelinin caynaqları Azərbaycana da çatır. Bu narkokartelin Arktika və Antarktidadan başqa dünyanın bütün qitələrində özəkləri var.
“Sinaloa” kartelinin Azərbaycanla əlaqələri haqda 2012-ci ildə meksikalı araşdırmaçı-jurnalist Ayoan Grillonun kitabında bəhs edilmişdi. Kitabda “qanı çay kimi axıdan” beynəlxalq mafiyanın fəaliyyətindən bəhs edilirdi.
“El Narco” adlı kitabda narkomafiyanın dəhşətli cinayətləri barədə tükürpədici faktlar yer almışdı. Kitab barədə xəbər yayan Amerika KİV-ləri əsəbləri zəif olanların onu oxumasını məsləhət görmürdü.
Müəllifin Meksikada fəaliyyət göstərdiyi, Latın Amerikası üzrə ixtisaslaşdığı və kitabı yazmaq üçün bir çox region ölkələrinin təhlükəsizlik qüvvələrinin rəhbərliyi, polis qaynaqları, mafiyanın nüfuzlu şəxsləri ilə apardığı araşdırmalara əsaslandığı bildirilirdi. Kitabda dünyanın onlarla ölkəsində fəaliyyət göstərən beynəlxalq narkomafiya “El Narco İnc” olaraq adlandırılır.
Müəllifin yazdığına görə, Meksikanın bir sıra əyalətlərində narkotik dövriyyəsinə nəzarət edən silahlı qruplaşmaların olduqca güclü beynəlxalq dayaqları var.
“Kolumbiya, ABŞ və Qvatemalada möhkəmlənən mafiyanın artıq Afrika, Avstraliya və Azərbaycanda da özəkləri fəaliyyət göstərir” – deyə kitab barədə xəbərlərdə bildirilib.
Short URL: http://www.cumhuriyyet.net/?p=28021
