Keçmiş nazir içib ölüb, yoxsa döyüb öldürülüb?
Rusiyanın keçmiş mətbuat naziri, “Qazprom-Media” holdinqinin rəhbəri olmuş Mixail Lesinin Vaşinqtondakı müəmmalı ölümü ətrafında çoxsaylı suallar qalmaqdadır.
Virtualaz.org xəbər verir ki, “The Washington Post” qəzeti Lesinlə bağlı yeni nüanslar barədə yazıb.
Qəzetin yazdığına görə Lesin ötən il noyabrın 4-də axşam olduqca sərxoş halda Corctaundakı “Four Seasons” otelinin barına daxil olub. Barmen ondan barı tərk etməyi xahiş edib. Bu haqda həmin səhnənin şahidi olan iki polis danışıb.
Lesin bardan bir şüşə içki götürüb, ancaq polislər onun içkinin pulunu verib-vermədiyini görməyiblər. Sonra Lesin nömrə kirayələdiyi bu oteldən çıxaraq “Dupont Circle Hotel”ə yollanıb. Otelin videomüşahidə kameralarının qeydə aldığı görüntülərə əsasən rusiyalı oliqarx bir qədər əzgin görünür, ancaq onda aşkar xəsarət izləri yoxdur.
Xəbər verildiyi kimi rusiyalı milyoner-oliqarxın əvvəlcə ürək tutmasından öldüyü açıqlanıb. Lakin bir neçə gün əvvəl, martın 10-da Vaşinqtonun məhkəmə-tibb ekspertləri rəsmən elan ediblər ki, Lesinin ölümünə başından küt alətlə endirilən zərbələr səbəb olub. Habelə onun bədəninin başqa yerlərində xəsarət izləri aşkarlanıb.
Kremlə çox yaxın olan oliqarx Vaşinqtona ölümündən bir neçə həftə əvvəl gedibmiş. Lakin onun ABŞ-a hansı məqsədlə getdiyi məlum deyil. Versiyalara görə Lesin ABŞ Federal Təhqiqatlar Bürosu ilə sövdələşməyə girərək Los-Angelesdə aldığı 3 villarını qorumaq və ABŞ-da yaşamaq, əvəzində Kremlin sirlərini ötürmmək üçün Vaşinqtona gedə bilərdi.
Kolumbiya dairəsininn (Vaşinqton) yüksək rütbəli polis zabiti deyib ki, ola bilsin Lesin otelə gəlməzdən əvvəl hansısa davada iştirak edib və nömrəsinə qayıdandan sonra ölüb. Ancaq həmin polis rəsmisi başqa versiyaların da araşdırıldığını, Lesinin yıxılma, yaxud maşının altına düşmə nəticəsində xəsarətlər ala biləcəyinin də araşdırıldığını deyib. Hələlik bu və ya digər versiya üzərində dayanmaq üçün dəlil yoxdur. “Biz bilmirik nə baş verib, bilmirik o, həmin xəsarətləri necə alıb”-polis bildirib.
Qəzet xatırladır ki, Lesin “Qazprom-Media” holdiqinin rəhbəri olub və holdinqə daxil olan “Exo Moskva” radiostansiyasının baş redaktoru Aleksandr Venediktovla münaqişədən sonra işdən gedib. Münaqişənin səbəbi Kremli tənqid edən jurnalistin işdən çıxarılması olmuşdu. Holdinqi tərk edəndən sonra Lesin Los-Angelesdə üç villa alıb. Bunlardan ikisində onun oğlu və qızı yaşayır.
Noyabrın 3-də, cəsədi oteldə tapılandan iki gün əvvəl Lesin Vudro Vilson Mərkəzinin Kennan İnstitunda təşkil edilmiş xeyriyyə tədbirinə qatılmalıydı. Həmin tədbirə dəvət almışdı, ancaq tədbirdə iştirak etməyib.
Rusiyanın “Dojd” telekanalı isə xəbər verib ki, Lesini ölümündən az əvvəl görən adam var və həmin mənbə oliqarxın dostlarının, tanışlarının əhatəsində olduğunu görüb. Mənbənin dediyinə görə ola bilsin Lesin otelin yaxınlığında dalaşıb.
Lesinin çoxdankı dostu və işgüzar partnyoru Sergey Vasilyev isə deyib ki, onu fikrincə keçmiş nazir möhkəm sərxoş olduğu üçün yıxılıb. Rusiya XİN-dəki mənbələrə istinad edən Vasilyev deyib ki, noyabrın 2-də oteldə yerləşəndə Lesin artıq sərxoş imiş. Səhər tezdən isə o, yenə də içki dalınca gedib. Onun bildirdiyinə görə, noyabrın 4-də otelin əməkdaşı Lesinin otağının qapısını döyüb. Çünki o, otaqdan xeyli vaxtdır çıxmırmış: “O, görüb ki, Mixail sərxoş halda döşməyə uzanıb yatır. Əməkdaş onu çarpayıya qaldırmaq istəyib, ancaq Mixail müqavimət göstərib. Bundan sonra əməkdaş otağı tərk edib. Ertəsi gün xidmətçi onun cəsədini həmin yerdə, döşəmədə görüb. Mişanın əvvəllər də ürək tutması olub, elə olub ki, yıxılıb, ciddi zədə alıb”.
“Dupont Hotel”in nümayəndəsi isə situasiyanı şərh etməkdən imtina edib.
Short URL: http://www.cumhuriyyet.net/?p=57661
