Ankara 45 tayfanı ayağa qaldırdı

Dünən Suriyanın şimalında üç kürd kantonu əsasında federasiyanın yaradılması bu ölkədəki ərəb tayfalarını ayağa qaldırıb.

Publika.az xəbər verir ki, Türkiyənin Şanlıurfa vilayətində keçirilən toplantıda PYD-yə (PKK terror təşkilatının Suriya qolu hesab edilir) qarşı “Ceyş Aşair əl-Şarkiyə” (“Şərq Tayfaları Ordusu”) adlı ordunun qurulması barədə razılıq əldə olunub.

Hələb, Der əz-Zor, Rakka və Haseka vilayətlərinin nüfuzlu tayfan başçılarının qatıldığı toplantıda 45 tayfa lideri iştirak edib. Azad Suriya Ordusunun (ASO) Baş Qərargah rəisi general Əhməd Berrinin də qatıldığı toplantıda “Şimali Suriya Federasiyası”nın Suriya xalqına xəyanət olduğu və qurumun tanınmayacağı bildirilib.

Toplantıda PYD-nin aradan qaldırılana kimi “Ceyş Aşair əl-Şarkiyə”nin saxlanılması qərara alınıb.

Qeyd edək ki, dünən Cəzirə, Kobani və Afrin kantonundan olan nümayəndələr Rmeylan şəhərində keçirilən konfransda federasiyanın yaradılması haqqında bəyannaməyə səs veriblər.

Short URL: http://www.cumhuriyyet.net/?p=58145