Braziliya millisinin yeni baş məşqçisi
Braziliya milli komandasının yeni baş məşqçisi müəyyənləşib. ANS PRESS-in məlumatına görə, bu posta rəsmən Tite təyin edilib.
Bu barədə Braziliya Futbol Konfederasiyasının rəsmi saytı məlumat yayıb. 55 yaşlı mütəxəssis yeni vəzifədə Dunqanı əvəzləyib. Dunqa Amerika Kubokunda “pentakampeonlar”ı 1/4 finala çıxara bilmədikdən sonra istefaya göndərilib. Tite isə “Korintians”la 6 dəfə çempionluq sevinci yaşayıb. O, yığmada əsas məqsədlərinin 2018-ci il dünya çempionatına vəsiqə qazanmaqdan ibarət olduğunu bildirib.
Hazırda Braziliya millisi Cənubi Amerika zonasında keçirilən seçmə mərhələdə 9 oyundan 9 xalla 10 komanda arasında 6-cı pillədə qərarlaşıb. Amma qarşıda hələ 9 tur var.
Karlos Dunqa Braziliya futbol yığması ilə 2006-2010-cu illərdə də işləyib. O, bu müddət ərzində komanda ilə 2007-ci ildə Amerika Kubokunu, 2009-cu ildə isə Konfederasiya kubokunu qazanıb. Futbolçu kimi Dunqa 1994-cü ildə dünya çempionu adına sahib olub.
Short URL: http://www.cumhuriyyet.net/?p=67744
