Türkiyə Papanı da tənqid etdi – NÖVBƏTİ QALMAQAL
Türkiyə Roma Papası Fransiskin Ermənistan səfəri zamanı “erməni soyqırımı” deməsini sərt tənqid edib. ANS PRESS-in məlumatına görə, bu, Türkiyə Xarici İşlər Nazirliyinin (XİN) Roma Papasının İrəvanda 1915-ci il hadisələrini ermənilərin “soyqırımı” kimi dəyərləndirməsinə etiraz bəyanatında bildirilib.
“Roma Papası Fransiskin saxta “erməni soyqırımı” ifadəsini işlətməsi, 1915-ci hadisələri ilə bağlı erməni katalikosu ilə bəyanat qəbul etməsi, ölkəsinə qayıdanda yalan və iftira dolu sözlər işlətməsi onun ermənilərin təsiri altında danışdığını bir daha göstərir”.
XİN Papanın çıxışını yalan və böhtan dolu adlandırıb.
Bundan əvvəl Türkiyə baş nazirinin müavini Nurəddin Canikli Papanın “soyqırım” deməsinə reaksiya verərək demişdi ki, onun işlətdiyi ifadələr obyektiv deyil və həqiqətə uyğun gəlmir.
Onun sözlərinə görə, Papanın belə bir açıqlama verməsi böyük ədalətsizlikdir. “Obyektiv və həqiqətə uyğun deyil. Bunu ermənilər və bütün dünya bilir. Təbii ki, bu çıxışa ciddi yanaşmırıq. Bu millətin tarixində belə bir ləkə yoxdur”.
O deyib ki, Roma Papasının fəaliyyətində xaçlı zehniyyətinin təzahürlərini açıq-aşkar görmək mümkündür.
Roma Papası Fransisk Ermənistana səfəri zamanı “erməni soyqırımı” ifadəsini işlədib. Ermənistana ziyarətinin ilk günündə Papa nitqi zamanı əvvəlcədən mətnə daxil edilməyən fikirlərini söyləyib.
Ekspromt deyilən nitqdə Papa Fransisk osmanlıların ermənilərə qarşı “soyqırım” törətdiyini bildirib.
Short URL: http://www.cumhuriyyet.net/?p=68221
