Avropa İttifaqının yerinə yeni superdövlət yaradılır

Polşanın TVR dövlət kanalı Fransa və Almaniyanın Avropa İttifaqının əvəzinə yeni “super dövlət yaratmaq” layihəsi üzərində işlədiyini bildirib.

Ölkə.Az-ın Rusiya KİV-lərinə istinadən verdiyi xəbərə görə, telekanal bu gün Almaniyanın xarici işlər naziri Frank Valter Ştanmayerin Vışeqrad dördlüyü ölkələrinin (Çexiya, Polşa, Slovakiya və Macarıstan) XİN başçılarının görüşündə layihə sənədini təqdim edəcəyini iddia edir. 9 səhifəlik sənəd Ştanmayer və Fransanın XİN başçısı Jan Mark Eyro tərəfindən hazırlanıb.

Sənəd Avropa İttifaqının bu gün ən güclü oyunçuları sayılan dövlətlərin rəhbərliyi ilə yeni superdövlətin yaradılmasını nəzərdə tutur. Yeni birliyə daxil olacaq dövlətlərin faktiki olaraq öz ordusu, xüsusi xidmət orqanları, cinayət məcəllələri, vergi sistemləri, xüsusi valyutaları olmayacaq.

Həmçinin, birliyə daxil olan dövlətlər öz sərhədlərinə və qaçqınların qəbul edilməsi, yerləşdirilməsi üzrə prosedurlara nəzarəti itirəcəklər. Bu birlikdə vahid viza sisteminin yaradılması və vahid xarici siyasət yürüdülməsi gözlənilir.

Yeni superdövlət NATO-nun Avropa qitəsindəki rolunu məhdudlaşdıracaq.

Short URL: http://www.cumhuriyyet.net/?p=68229