Bakıda həbs edilən Fransa vətəndaşı İlham Əliyevə müraciət edib

12.06.2024 - 11:59

Hazırda Bakı İstintaq Təcridxanasında saxlanılan Fransa vətəndaşı olan qraffiti rəssamı Clerc Theo Hugo-nun Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya müraciət edib.
Vəkil Elçin Sadıqovun Gununsesi.info-ya təqdim etdiyi müraciətdə Fransa vətəndaşı azad olunmasını xahiş edib.
Həmin müraciəti təqdim edirik:
Hörmətli cənab Prezident İlham Əliyev və Birinci Vitse-Prezident Mehriban xanım Əliyeva!
Bilirəm ki, siz çox məşğulsunuz, amma ümid edirəm ki, bu məktub sizə şəxsən çatacaq.
Mən səhvim üçün bu məktubu sizə yazıram və sizdən kömək istəyirəm.
Mənim adım Theo Clercdir, 38 yaşlı fransız dekorativ rəssamam. Mən “Lucy, Taken 3, Mission impossible 4” və bu yaxınlarda “John Wick 4” kimi bir çox filmlər üzərində işləmişəm. Mən də hər il Louis Vuitton, Balenciaga, Loewe və s. markaların modası üçün ssenari üzrə işləyirəm.
Mart ayında Bakıya səfər etmək qərarına gəldim, çünki Azərbaycan Qafqazda olmadığım sonuncu ölkə idi və bu mənə çox maraqlı idi. Mən iki dostumla birlikdə Bakıya gəldim və bir gecə metronu rəngləmək kimi axmaq bir fikir ağlımıza gəldi. Bizi həbs etdilər, dostlarımı buraxdılar, amma mən məhkəməni gözləmək üçün tək təcridxanaya göndərildim. Mən bunun səhv olduğunu etiraf edirəm və bunun qanunsuz olduğunu artıq bilirəm. Lakin bu işin bütün hamı tərəfdən tanınacağını və bu qədər ciddi qəbul ediləcəyini heç düşünməmişdik. Məqsədimiz heç kimi incitmək deyildi. Biz heç nəyi məhv etmədik və ya zədələmədik və ertəsi gün rəsmlər təmizləndi. Fransada metroda qraffiti istifadəçilər üçün gündəlik bir şeydir və insanların çoxu buna əhəmiyyət vermir. Bu barədə kamera yoldaşlarımla danışana qədər və ölkələrimiz arasındakı mədəniyyət fərqini başa düşənə qədər bunun mənfi təsirini dərk etməmişdim.
Düşündüm ki, Qarabağda münaqişə başa çatıb, atəşkəs sülh yolu ilə bərpa olunub. Amma hər gün xəbərlərdə görürük ki, hələ də erməni dini ekstremistləri tərəfindən sülh təhdid altındadır. Mən bir fakt bilirəm ki, Qarabağ Azərbaycanındır, o vaxtdan yazıçımız Aleksandr Düma da Qarabağa səfər edib. Şuşa tarixi ilə bağlı sizin çıxışlarınızı və müsahibələrinizi də dinləmişəm. Mən başqa bir kitabda erməni transmilli terrorizmi, dağıntılar və törətdikləri bütün vəhşiliklər haqqında öyrənmişəm. İndi başa düşürəm ki, mənim rəsmim insanların beynində qorxulu fikirlər oyandırıb. Mən buna görə utanıram və həqiqətən təəssüflənirəm. Mən siyasi şəxs deyiləm, humanist və sülhsevər insanam. Mən heç vaxt zorakılıq etməmişəm və heç kimə zərər verməmişəm. Mən narkotik istifadə etmirəm və alkoqol istifadəçisi də deyiləm. Mən cinayətkar deyiləm, sadəcə sənətkaram.
Artıq iki aydır həbsdəyəm, ailəm bu vəziyyətdən çox əziyyət çəkir və bu da məni məhv edir.
Xahiş edirəm, Cənab Prezident İlham Əliyev və Vitse-Prezident Mehriban xanım Əliyeva mənim işimdə mənə kömək edin və məhkəməm olana qədər azadlıqdakı dostlarıma qoşulmağa kömək edin. Həyatımın bu səhifəsini çevirməyə ehtiyacım var. Özümü bağışlatmaq üçün təşkil edə biləcəyim çoxlu bədii layihələr haqqında fikirlərim var, lakin həbsxanada tamamilə faydasız oluram. Mən istedadımı hamının xeyrinə müsbət və məhsuldar şəkildə istifadə etmək istəyirəm.
Vaxt ayırdığınız üçün təşəkkür edirəm.
Ümid edirəm ki, məni başa düşəcəksiniz və cahilliyimi bağışlayacaqsınız.
Ən xoş arzularla…
Clerc Theo Hugo
1 Saylı Bakı İstintaq Təcridxanası