Azərbaycanlı deputatlar Prezident seçkilərini izləməyə gedirlər
Milli Məclisin sədr müavini Fəzail İbrahimlinin başçılığı ilə parlament nümayəndə heyəti Özbəkistanda keçiriləcək Prezident seçkilərini müşahidə etmək üçün oktyabrın 21-də bu ölkənin paytaxtı Daşkənd şəhərinə səfərə yola düşəcək.
Bu barədə Milli Məclisin mətbuat xidmətindən məlumat verilib.
Bildirilib ki, vitse-spiker Fəzail İbrahimli və nümayəndə heyətinə daxil olan İntizam komissiyasının sədri Eldar İbrahimov, Mədəniyyət komitəsinin sədri Qənirə Paşayeva, deputatlar Cavanşir Paşazadə və Aydın Mirzəzadə MDB PA-nın xətti ilə, deputat Ağalar Vəliyev isə TÜRKPA-nın xətti ilə seçkiləri müşahidə edəcəklər.
Deputatlarımız seçkilərə hazırlığın səviyyəsi ilə maraqlanacaq, səsvermə günü müxtəlif məntəqələrdə seçkinin gedişini izləyəcək, vətəndaşların fəallığına, səsvermə prosesində seçicilərin hüquqlarının təmin olunmasına və demokratiyanın tələblərinə riayət edilməsinə diqqət yetirəcəklər.
Səfər oktyabrın 25-də başa çatacaq.
Short URL: http://www.cumhuriyyet.net/?p=167727
