“MB-ın səlahiyyətlərinin bir qisminin əlindən alınması ciddi hadisə deyil” – Ekspertdən şərh
Azərbaycan Mərkəzi Bankının səlahiyyətlərinin bir qismi əlindən alınaraq yeni yaradılmış Maliyyə Bazarlarına Nəzarət Palatasına verilir. Bununla bağlı Milli Məclisin Hüquq siyasəti və dövlət quruculuğu komitəsinin bu gün keçirilən iclasında Mülki Məcəlləyə dəyişiklik edilib.
Qərarla bağlı Qaynar.info-ya danışan iqtisadçı ekspert Natiq Cəfərli hesab edir ki, bunu böyük dəyişiklik kimi qeyd etmək mümkün deyil: “Söhbət bir maddəyə edilən dəyişiklikdən gedir. Bank təminatı olmayan çeklərin və yaxud qismən ödəniş şəklində olan çeklərin bildirişləri əvvəl Mərkəzi Banka göndərilirdi. Ancaq indi Mərkəzi Bank əvəzinə, Maliyyə Bazarına Nəzarət Palatası bu funksiyanı həyata keçirəcək. Bunu böyük dəyişiklik kimi qeyd etmək mümkün deyil. Əsas məsələ MB-nın səlahiyyətlərinin bir hissəsi ilk dəfədir ki, digər quruma verilir. Amma Azərbaycanda bank təminatı olmadığından, onların dövriyyəsi çox kiçik olduğundan və ümumiyyətlə bu tipli əməliyyatların az olduğunu nəzərə alaraq ciddi bir dəyişiklik kimi görmək olmaz”.
Natiq Cəfərlinin sözlərinə görə, bunu ilkin addım kimi qiymətləndirmək olar: “Ola bilsin ki, belə bir tendensiya yaransın. Gələcəkdə digər funksiyalarla bağlı və buna bənzər qərarlar verilsin. Bu baxımdan maraqlı bir qərardır”.
Short URL: http://www.cumhuriyyet.net/?p=56465
