AYNA-nın yeni qadağalarının məntiqsizliyi
Martın 11-dən etibarən “28 May” metrostansiyası və Bakı Dəmiryol Vağzalı qarşısında fərdi avtomobillərin hərəkəti məhdudlaşdırılıb, ərazidə yerləşən ödənişli parkinq isə ləğv edilib. Sonrakı günlərdə qadağadan xəbəri olmadığına görə əraziyə daxil olan sürücülər yol polisi tərəfindən 80 manat və 3 bal cərimə ilə cəzalandırılıb.
Daxili İşlər Nazirliyi (DİN) bildirib ki, qərar Bakı Şəhər Dövlət Yol Polisi İdarəsi və Azərbaycan Yerüstü Nəqliyyat Agentliyi (AYNA) tərəfindən birgə həyata keçirilir.
“Məqsəd sürücüləri cərimələmək yox, ərazini piyadaların hərəkəti üçün daha əlverişli zonaya çevirmək və təhlükəsizlik mühitini formalaşdırmaqdır”, – məlumatda qeyd olunur.
Maraqlıdır, bu qərar verilərkən piyadalarla bərabər həmin ərazidəki infrastrukturdan istifadə edən, ticarət, iaşə obyektlərində çalışan vətəndaşların rahatlığı niyə nəzərə alınmayıb?
Qeyd edək ki, “28 May” metrostansiyasının qarşısı paytaxın əsas nəqliyyat qovşaqlarından biri hesab olunur. Gün ərzində bu nöqtədən yüzlərlə ictimai nəqliyyat, avtobus müxtəlif istiqamətlərə hərəkətə edir. Əraziyə həm “Azadlıq” prospekti, həm də Səməd Vurğun bağı istiqamətdən daxil olmaq mümkündür. Meydanın keçmiş Dəmiryol Xəstəxanasının qarşı tərəfi ödənişli parkinq kimi istifadə edilir. Ətrafda yüzlərlə xırda ticarət və iaşə obyektləri var. Bakı Dəmir Yol Vağzalı, Asan Kommunal Mərkəzi, “28 Mall” Ticarət və Əyləncə mərkəzi, ADNSU, “28 May” Metrostansiyası gün ərzində on minlərlə vətəndaşın baş çəkdiyi ünvanlardır.
Təbbi ki, məhdudiyyət qərarı insanların bir qismi üçün rahatlıq yaradacaq, amma qadağalardan xeyli sayda vətəndaş əziyyət çəkəcək. Məsələn, Dəmir Yol Vağzalı həm ölkənin müxtəlif bölgələrinə, həm Bakı ətrafı yaşayış maasivlərinə, həm də Bakı-Sumqayıt qatarları ilə gedib-gələn sərnişinlərə xidmət edir. Nəzərə alaq ki, bölgələrə üz tutanlar və geri qayıdanların əksəriyyəti yüklərini taksi və ya fərdi avtomobillə “28 May” meydanına, oradan yük arabaları vasitəsi ilə dəmir yol platformasına daşıyırlar. Qadağalardan sonra necə olacaq? Vətəndaş qatara minən və ya qatardan düşüb şəhərə gələrkən uzun məsafəni ağır yüklə qət etməyə məcburdur. Qadağa müəllifləri bu barədə niyə düşünməyib?
Daha bir problemlə ərazidəki iaşə obyektlərində çalışan vətəndaşlar üzləşib. Məlumdur ki, yaxınlıqda ödənişli parkinqlər yoxdur, yalnız “28 Mall”ın məhdud yerli parkinqi var ki, orada isə gün ərzində avtomobil saxlamaq 10 manata başa gəlir. Yaxınlıqdakı küçələr dar olduğuna görə maşın saxlamağa icazə verilmir, nisbətən geniş yerləi isə AYNA işarələyib, onların xidmətindən isə yüksək gəlirli vətəndaşlar istifadə edə bilər. Çünki iş saatlarını çalışan şəxs gün ərzində ödənişli parkinqə azı 8-10 manat xərcləməlidir.
Xatırladaq ki, ərazidə yerləşən Dəmir Yol Xəstəxanası Əmək və Əhalinin Sosial Müdafiəsi Nazirliyinin balansına verilib. Nazirlik onu əlillərin sağlamlığı və reablitasiyası mərkəzinə çevirmək niyyətindədir, hazırda təhvil-təslim işləri gedir. Sözügedən binanın qarşına avtomobillə dayanmağa icazə verilmir, belə çıxır, gələcəkdə əlil vətəndaşlarımız üçün indiki qadağaların götürülməsi lazım gələcək.
E.Rüstəmli
“AzPolitika.info”
Short URL: http://www.cumhuriyyet.net/?p=199312
