Pilot Rəşad Atakişiyevin nəşi tapıldı
İyulun 24-də plana uyğun olaraq gecə vaxtı təlim-məşq uçuşları keçirən zaman qəzaya uğrayan Hərbi Hava Qüvvələrinin MiQ-29 təyyarəsinin pilotu polkovnik-leytenant Atakişiyev Rəşad Saləddin oğlunun nəşi və təyyarənin qalıqları tapılaraq dənizdən çıxarılıb. Məlumatı Müdafiə Nazirliyinin mətbuat xidməti yayıb.
Məlumatda deyilir ki, sabah avqustun 21-də saat 10.00-da Silahlı Qüvvələrin Təlim-Tədris Mərkəzində hərbi pilotla vida mərasimi keçiriləcək. Hazırda hərbi pilotun dəfninin təşkili ilə bağlı müvafiq tədbirlər həyata keçirilir.
Pilotun qaynatası, politoloq Qabil Hüseynli yerli KİV-lərə deyib ki, pilotun cənazəsi II Fəxri Xiyabanda dəfn olunacaq.
R.Atakişiyev Azərbaycan Hərbi Hava Qüvvələrinin ən peşəkar pilotlarından biri hesab olunurdu. Onun idarə etdiyi təyyarənin qəzaya uğramasının səbəbləri hələ məlum deyil, təyyarənin “qara qutu”su artıq tapılıb və cihazın deşifrəsindən sonra səbəblər məlum ola bilər.
Virtualaz.org
Short URL: http://www.cumhuriyyet.net/?p=132116
