Benzinin idxal qiyməti ARTIB
2021-ci ildə Azərbaycan ümumi 155 092,66 ton həcmində benzin (115 888 260 dollar dəyərində) idxal edib.
Oxu.Az-ın araşdırmasına görə, ümumi idxal həcmi 2020-ci illə müqayisədə 40 484,78 ton və ya 35,3 faiz artıb.
2021-ci ildə 2020-ci illə müqayisədə Azərbaycanın idxal etdiyi “Aİ-95” premium ilə “Aİ-98” super markalı benzinin orta illik dəyəri artıb.
Belə ki, bu dövr ərzində 147 412,23 ton həcmində, 111 106 150 dollar dəyərində “Aİ-95” premium markalı benzin idxal edilib. “Aİ-95” markalı benzinin bir ton üçün orta illik dəyəri 753,71 dollar təşkil edib. Bu isə əvvəlki il idxal edilən “Aİ-95” markalı benzinin bir ton üçün orta idxal dəyərindən 24,7 faiz çoxdur.
2021-ci ildə ölkəyə 2 684,79 ton həcmində və 2 395 070 dollar dəyərində “Aİ-98” markalı benzin idxal edilib. Bir ton üçün məhsulun orta illik idxal dəyəri 892,08 dollar təşkil edib ki, bu da 2020-ci ildə idxal edilən bir ton “Aİ-98” markalı benzinin orta illik idxal dəyərindən 12,9 faiz çoxdur.
Eləcə də, bu dövrdə 4 995,64 ton həcmində 2 387 040 dollar dəyərində oktanı 95-dən az olan benzin idxalı baş tutub. Bu məhsulun bir ton üçün gömrük dəyəri 477,8 dollar təşkil edib.
Qeyd edək ki, 2020-ci ildə aylarında Azərbaycan ümumi 115 607,88 ton həcmində benzin (70 510 290 dollar dəyərində) idxal edib.
Short URL: http://www.cumhuriyyet.net/?p=170876
