Azərbaycanlı əsirin məktubu 28 il sonra üzə çıxdı – Qırmızı Xaç onu sağ görüb, amma xilas etməyib!
Fərrux kəndi ərazisində bu günlərdə kütləvi məzarlıq aşkarlandı. Həmin insan qalıqları birinci Qarabağ müharibəsi zamanı itkin düşmüş şəxslərə aiddir və onların kimliyi DTN analizləri ilə müəyyən ediləcək.
Musavat.com xəbər verir ki, belə bir ərəfədə Ermənistanın törətmiş olduğu, habelə beynəlxalq qurumların göz yumduğu dəhşətli bir fakt üzə çıxıb.
Belə ki, Quba rayonundan olan hərbi qulluqçu Novruzov Laçın Əhməd oğlunun 1994-cü ildə əsirlikdə olarkən Qırmızı Xaç vasitəsi ilə evlərinə göndərdiyi məktub üzə çıxıb. Əsirin məktubu sosial şəbəkələrdə yayılıb.
Məktubda Laçın Novruzov həmin vaxt sağ olduğunu, Ermənistanın Edili kəndində (böyük ehtimalla həmin zaman erməni işğalında olan Xocavəndin Edilli kəndini nəzərdə tutulur, mümkündür ki, əsirə buranın guya Ermənistanın ərazisi olduğu deyilib, yaxud belə yazmağa məcbur edilib-red.) saxlanıldığını yazıb və ailəsinə onu əsirlikdən qurtamaq üçün yalvarış dolu, ürək sızladan xahiş edib.
Lakin belə məlum olur ki, Qırmızı Xaç həmin zaman yeri-yurdu dəqiq bəlli olan azərbaycanlının taleyinə biganə yanaşıb, Laçının geri qaytarılması üçün heç bir iş görməyib.
Əsirlikdən qayıtmış bəzi şəxslər iddia ediblər ki, Laçın Novruzov bu məktubunu yazdıqdan bir müddət sonra işgəncələrlə qətlə yetirilib. Harada basdırıldığı məlum deyil…
Amma Laçın Novruzovun taleyi haqda heç bir rəsmi məlumat verilməyib.
Bu məsələdə Qırmızı Xaçın da ciddi məsuliyyəti var.
Qurum bu məktubdan sonra dərhal hərəkətlənməli, yeri dəqiq bilinən əsirin geri qaytarılması, ən azı təhlükəsizliyi üçün Ermənistan qarşısında tələb qoymalı idi. Bunu ediblərmi? Əgər etsəydilər ən azı bir açıqlama yayardılar, ailəsinə məlumat verərdilər. Ancaq bunu etdiklərinə dair heç bir məlumat yoxdur. Ailənin sorğularına cavab da verməyiblər.
Bu məktubdan aydın olur ki, Ermənistanın girov və əsir götürdüyü 4 minə yaxın azərbaycanlıların bir çoxunu Qırmızı Xaçın əməkdaşları sağ ikən görüblər, yerini biliblər. Ancaq onların təhlükəsizliyi, geri qaytarılması üçün heç bir iş görməyiblər və nəticədə onlar ermənilər tərəfindən öldürülüb. Bu Qırmızı Xaç üçün utanc olmalıdır. Laçın Novruzovun timsalında neçə-neçə azərbaycanlının işgəncə altında öldürülüməsini görməzdən gəliblər…
Short URL: http://www.cumhuriyyet.net/?p=172806
