“El Klasiko” koronavirusa görə təxirə salına bilər
İspaniya La Liqasının XXVI turu çərçivəsində keçiriləcək “Real” – “Barselona” oyunu təxirə salına bilər.
Virtualaz.org yerli KİV-ə istinadən bildirir ki, bunu İspaniya Peşəkar Futbol Liqasının prezidenti Xavyer Tebas deyib.
O bildirib ki, koronavirusla bağlı problem böyüyərsə, sabahkı oyun baş tutmaya bilər. Həmçinin qarşılaşmanın boş tribunalar önündə keçirilməsi də istisna edilmir: “Madriddə koronavirus halı aşkarlanmayıb. Bu baş verərsə, “El Klasiko”nu azarkeşsiz keçirmək və ya təxirə salmaq kimi variantlara əl ata bilərik”.
Qeyd edək ki, “Santyaqo Bernabeu”da keçiriləcək oyun Bakı vaxtı ilə 00:00-da start götürəcək.
Bu arada məlum olub ki, İtaliya A seriyasında XXVI turun 5 oyunu keçirilməyəcək. Belə ki, İtaliya Futbol Federasiyası ölkədə koronavirusun yayılması səbəbindən bu gün və sabah oynanılmalı olan matçları təxirə salmaq qərarına gəlib. Bunlar “Udineze” – “Fiorentina”, “Milan” – “Cenoa”, “Parma” – “Spal”, “Sassuolo” – “Breşiya” və “Yuventus” – “İnter” qarşılaşmalarıdır. Federasiya həmin görüşlərin mayın 13-də keçiriləcəyini açıqlayıb.
Short URL: http://www.cumhuriyyet.net/?p=143310