Bərdədə kütləvi zəhərlənmə – Bakıdan həkim göndərildi

13:53

Bərdə rayonunda kütləvi zəhərlənmə hadisəsi baş verib.

Hadisə rayonun Xan Ərəb kəndində qeydə alınıb.

Həmin kənddə yaşayan bir ailənin 5 üzvü – 45 yaşlı Könül Məmmədova, 22 yaşlı Pərviz Məmmədov, 25 yaşlı Cəmalə Məmmədova, 5 yaşlı Cahid Məmmədov və 8 aylıq körpə Cihan Məmmədov zəhərlənmə diaqnozu ilə Bərdə Rayon Mərkəzi Xəstəxanasına (RMX) yerləşdirilib.

Xəstəxanadan bildirilib ki, K.Məmmədova, P.Məmmədov və onların 8 aylıq körpəsi C.Məmmədovun vəziyyətləri daha ağır olduğu ücün Reanimasiya şöbəsinə yerləşdirilib. Digər şəxslərin durumu isə kafi qiymətləndirilir.

Zəhərlənən şəxslərin qohumlarının bildirdiyinə görə, ailə üzvləri axşam yeməyində özləri bağladıqları pomidor turşusundan istifadə ediblər.(Report.az)

***

Bərdənin Xan Ərəb kəndində zəhərlənmə nəticəsində Rayon Mərkəzi Xəstəxanasına yerləşdirilən 45 yaşlı Könül Məmmədova, 22 yaşlı Pərviz Məmmədov və 5 yaşlı Cahid Məmmədovun müalicəsi davam etdirilir.

Bu barədə xəstəxananın baş həkimi Rəna Mustafayeva məlumat verib.

Baş həkim bildirib ki, aparılan müalicələr nəticəsində K.Məmmədova və P.Məmmədovun səhhəti nisbətən normallaşsa da, 5 yaşlı Cahid Məmmədovun vəziyyəti həddindən artıq ağırdır:

“Əvvəlcə uşağı uşaq xəstəxanasına aparmışdılar. Vəziyyəti ağır olduğu üçün onu öz xəstəxanamıza köçürdük. Hazırda reanimasiyadadır, vəziyyəti həddindən artıq ağırdır. Əlimizdən gələni edirik”.

Baş həkim bildirib ki, uşağın vəziyyəti ağır olduğundan paytaxtdan kömək çağırılıb: “Səhiyyə Nazirliyinin göstərişi ilə Mərkəzi Klinik Xəstəxanadan anestezioloq və reanimatoloq xəstəxanaya ezam olunub. Həkimlər 20 gün burada olacaq və uşağın sağalması üçün lazım olan bütün vasitələrdən istifadə olunacaq”.(Trend.az)

Short URL: http://www.cumhuriyyet.net/?p=80940