QUSARDA CAMAATA SU ƏVƏZİNƏ PALÇIQ VERİRLƏR! – Şikayət + VİDEO

“Artıq 10-12 gündür Qusar rayonunda evlərə demək olar ki, su verilmir. Əvvəllər gündə 2 saat su verilirdisə, indi iki gündən bir yarım saat verilərək, kəsilir.”

Bu fikirlər bir qrup Qusar rayon sakininin “AzPolitika.info”ya göndərdiyi şikayətdə yer alb.

Sakinlərin sözlərinə görə, rayona verilən su Qusar çayının suyuna qarışdırıldığından keyfiyyəti də həddən artıq aşağıdır: “Qusar çayına hazırda Laza kəndi yaxınlığında püskürən vulkanın lavası qarışıb. Ona görə də, içdiyimiz suyun hansı keyfiyyətdə, mənşəyinin nə oduğunu belə bilmirik.”

Rayon sakinləri aidiyyatı dövlət qurumlarına şikayətlərinə də baxılmadığını bildirirlər: “Dəfələrlə “Azərsu” ASC-nin yerli idarəsinə şikayət etmişik. İdarənin rəhbəri bildirib ki, mənlik deyil. Hətta dedi ki, “mən özüm də aciz qalmışam”.

İcra Hakimiyyəti isə bu məsələ ilə ümumiyyətlə maraqlanmır. İcra Hakimiyyətinin Aparatında şikayətimizi sonadək dinləmədilər. Dedilər ki, onların su idarələri üzərində səlahiyyətləri yoxdur. Buna görə də, nə isə tələb edə, tapşırıq verə bilmirlər. “Su idarəsi “Azərsu” ASC-nin tabeliyindədir, gedin şikayətinizi onlara edin” –deyib bizi yola saldılar.”

Ona görə də “AzPolitika.info” saytına müraciət etdik ki, səsimizi “Azərsu” ASC-nin rəhbərliyinə çatdırasınız. Qusar camaatı susuz qalıb, kömək edin!”

Qeyd edək ki, sakinlərin şikayəti ilə bağlı “Azərsu” ASC-nin mövqeyini öyrənməyə çalışsaq da, iş günü olmadığından telefonlara cavab verən olmadı.

Sakinlərin çəkdiyi və iki gündən bir evlərə verilən suyun hansı vəziyyətdə olduğunu göstərən videonu isə təqdim edirik:

Short URL: http://www.cumhuriyyet.net/?p=131990