“Seyidlik” vəsiqəsi verən Hacının DYP-çi oğlu sürücülərə ‘qan uddurur’ – İDDİA
Qafqaz Müsəlmanları İdarəsinin Cənub bölgəsi üzrə qazisi, “seyidlik” vəsiqəsi verən, bu səbəbdən də geniş ictimaiyyət tərəfindən qınanan Hacı Mirqiyas Təhməzovun Masallı rayon Yol Patrul Xidmətinin əməkdaşı olan oğlu Mirxas Təhməzov barədə Respublikanın Birinci Vitse-Prezidenti Mehriban xanım Əliyevaya müraciət ünvanlanıb.
İCMAL.az xəbər verir ki, Masalı rayonu, Boradigah qəsəbə sakini Fərid Nağıyev tərəfindən ünvanlanan müraciətdə şikayətçi 5 mart 2017-ci il tarixdə, saat 11-30 radələrində Masallı – Yardımlı yolunda (Ərkivan qəs. ərazisində) baş verən qəzadan sonra başına gətirilən haqsızlıqlardan bəhs edir.
F.Nağıyev bildirir ki, YPX əməkdaşı Mirxas Təhməzov adlı polis zabitinin qeyri-qanuni təkliflərindən imtina etdiyi üçün, özü və ailəsi Polis İdarəsində təhqirlərə məruz qalıb. Təhqir və təzyiqlərə dözməyən F.Nağıyev olanlarla bağlı DİN-in “102” xidmətinə, həmçinin rayon prokurorluğuna məlumat etsə də işə obyektiv baxılmadığını, əksinə rayon məhkəməsinin qərarı ilə qardaşı Xəyal Nağıyevin 10 gün həbsdə yatdığını iddia edir.
F.Nağıyev təzyiq və təhdidlər qarşısında – qardaşının daha ağır maddələrlə uzunmüddətli həbs ediləcəyi hədəsindən ehtiyatlanaraq sonda polisin istədiyi kimi hərəkət edir. Hadisədən 5-6 gün sonra izahat yazır ki, günahkar özüdür və qəzanı da onun özü törədib.
Sonra Baş prokurora, daxili işlər və ədliyyə nazirinə ailəlikcə müraciət ünvanlayırlar. İstəkləri də bu olur ki, haqq və hüquqlarını ayaqlar altına atıb tapdayan, həyatlarını cəhənnəmə döndərən bu kimi üzdəniraq polis əməkdaşlarının özbaşına hərəkət və hegemonluğunun qarşısı alınsın, məhkəmə zalında hadisə şahidlərini dindirmədən, ərazidəki müşahidə kameralarına (həm hadisənin baş verdiyi yerdə, həm də Polis şöbəsinin inzibati binasında) baxış keçirmədən, ortada heç bir maddi sübut olmadan qərar çıxaran hakimlər haqda lazımi tədbirlər görülsün.
Birinci Vitse-Prezident Mehriban xanım Əliyevaya müraciət edən Nağıyevlər ailəsi qanunların hər şeydən uca tutulacağına inanırlar.
cumhuriyyet.net
Short URL: http://www.cumhuriyyet.net/?p=96415
