Azər Qasımlıdan ittihamlı seçki bəyanatı: “Məndə ciddi şübhələr var ki…”

“Daha öncə dairəmizdə Ağabala Quliyevin Ziyad Səmədzadə ilə özəl münasibətləri haqqında söz-söhbətlər gəzirdi”

23 saylı Nəsimi-Səbail Seçki Dairəsinin sədri Ağabala Quliyev deputatlığa namizəd Azər Qasımlının şikayətini qəbul etməkdən imtina edib. Bu barədə Azər Qasımlı Meydan TV-yə məlumat verib. Onun sözlərinə görə, 17 səhifəlik şikayət ərizəsi, 31 foto, 30 video, 2 audio yazı, 98 qanun pozuntularına dair akt və 4 saxta protokol DSK-ya təqdim olunub. Lakin sənədlərin təqdimatı zamanı da qanun pozuntusu ilə üzləşib: “Dairə Komissiyasının sədri Ağabala Quliyev məndən şikayət ərizəsini almaqdan imtina etdi. Dedi ki, güya onun belə bir səlahiyyəti yoxdur. Halbuki bu məsələ qanunla müəyyən edilən adi bir prosedur qaydadır. Bunların hər işinə hazır olduğumuzdan özümlə təcili poçtdan nümayəndə aparmışdım. Elə ordaca sənədlərimi poçt nümayəndəsinə verib, Ağabala Quliyevə poçt vasitəsilə şikayətimi təqdim edə bildim. Sonra təcili poçtdan MSK-ya bununla bağlı şikayət teleqramı ünvanladım”.

Azər Qasımlı deyir ki, Ağabala Quliyevin hərəkəti onda ciddi şübhələr yaradıb: “İndi tam ciddi olaraq fikirləşirəm ki, seçki günü bütün bu karuselləri, topa bülleten atma, seçki komissiyaları tərəfindən edilən qanun pozuntuları məhz DSK tərəfindən, şəxsən Ağabala Quliyevin iştirakı ilə həyata keçirilib. Daha öncə dairəmizdə Ağabala Quliyevin Ziyad Səmədzadə ilə özəl münasibətləri haqqında söz-söhbətlər gəzirdi. Bu saxtakarlıqların üstünü açmaq üçün əlimdən gələni edəcəyəm. Mən bu dairənin qalibiyəm və bunu hər kəsə sübut edəcəyəm!”

Short URL: http://www.cumhuriyyet.net/?p=37683