Afinadan məxfi sənəd: “Kiprdə türk ordusu…”
Kiprdə Türkiyə ordusunun qalması buradakı böhranın həllinə yardım edə bilməz.
Bunu Kipr Xarici İşlər Nazirliyinin məxfi olaraq hazırladığı “Zəmanət sisteminin ləğvi, dostluq və təhlükəsizlik razılaşmasının hazırlanması” sənədində yer alıb. Sənəd Yunanıstan Xarici İşlər naziri Nikos Kotzias tərəfindən imzalanıb. Məhz bu sənəddə Kipr münaqişəsinin həll olunmasına dair Afinanın yanaşması əks olunub:
“Əgər sülh müqaviləsindən sonra zəmanət və işğal qalarsa, Avropa Birliyinin üzvü olan Kipr birlik üzvü olmayan üçüncü qüvvənin protektoratı olacaq. Bu mövqe Yunanıstanın təhlükəsizlik doktrinasının əsas sütunudur. Kiprdə kiçik həcmdə olsa belə Türkiyə ordusunun qalması qəbuledilməzdir”.
Qeyd edək ki, 1960-cı ildə Kiprə müstəqillik verilməsi haqqında müqaviləyə əsasən, ölkənin müstəqilliyinin zəmanətçisi Böyük Britaniya, Yunanıstan və Türkiyə oldu. Bundan sonra Kiprdə yunanlar adanı Yunanıstanla birləşdirməyə cəhd etdilər. Ankara buna etiraz edərək, 1974-cü ildə adaya desant çıxardı. 1983-cü ildə Ankaranın tutduğu ərazilərdə Şimali Kipr Türk Respublikası yaradıldı. İndiyə qədər bu ölkənin müstəqilliyini Türkiyədən başqa heç kim tanımır.
Short URL: http://www.cumhuriyyet.net/?p=79992
