REAL nə zaman partiya olacaq?
“Respublikaçı Alternativ (REAL) Hərəkatının partiyaya çevrilməsi ilə bağlı çox ciddi işlər gedir. Bizim proqramda nəzərdə tutulmuş el məclislərinin formalaşması demək olar ki, bitmək üzrədir. Bu proqramda 23 el məclisinin formalaşması nəzərdə tutulmuşdu. Artıq bunun 19-u formalaşıb. Alt yapı və infrastruktur hazır olandan sonra isə qurultayın günü təyin olunacaq. Daha sonra isə qurultayla bağlı qərarımızı həyata keçirəcəyik”.
Bunu açıqlamasında REAL Hərəkatının icra katibi Natiq Cəfərli deyib.
Natiq Cəfərli bildirib ki, Ədliyyə Nazirliyinin REAL Hərəkatını partiya kimi qeydiyyatdan keçirəcəyini güman etmirlər.
“Biz sadəcə olaraq burda bir problemin olacağını gözləyirik. Düşünürük ki, belə problem yaransa, qanunvercilikdə nəzərdə tutulmuş bütün qaydalara uyğun olaraq addımlar atacağıq. Məhkəmələrə müraciət edəcəyik. Məhkəmələrdən də qeydiyyatla bağlı qərar ala bilməsək, sonuc etibarı ilə Avropa Məhkəməsinə qədər bu işi aparmağı düşünürük.
O, həmçinin qeyd edib ki, partiya məclisi idarə heyətini seçdikdən sonra yeni insanların da REAL-ın idarə heyyətində olması ehtimalı yüksəkdir.
“İlk öncə qurultayda seçkilər olacaq. Seçkilər zamanı partiya məclisi seçiləcək. Partiya məclisi isə öz növbəsində idarə heyyətini təyin edəcək”.(modern.az)
Short URL: http://www.cumhuriyyet.net/?p=79688
