Yerevanda müharibə əleyhinə yürüş: "Əsgərlər ölür, oliqarxlar varlanır"

09.08.2014 - 02:07

Ermənistanda bir qrup ictmai fəallar müharibə əleyhinə yürüş keçirib.

Onlar Ermənistan-Azərbaycan sərhədi və
Qarabağ-Azərbaycan təmas xəttində vəziyyətin gərginləşməsində
“Ermənistan və Azərbaycan rəhbərlikləri və bölgədə öz maraqlarını güdən
üçüncü qüvvələri, ilk növbədə Rusiyanı” təqsirləndiriblər.

Yürüş iştirakçıları Ermənistan və
Avropa İttifaqı bayraqları, sülhə çağıran şüarlarla Ermənistan Xarici
İşlər Nazirliyi binası önündən şəhərin mərkəzi küçələri ilə keçib,
Azadlıq meydanında toplaşaraq Ermənistan və Azərbaycan cəmiyyətlərində
“iki xalqı müharibəyə sürükləyən rejimlərin niyyətlərinin
gerçəkləşməsinə qarşı mübarizə” yollarını müzakirə ediblər.

Yürüşdə iştirakçıların əllərində tutduqları
şüarlar üzərində “Xalqlara – sülh, hakimiyyətlərə – müharibə”, “Heç bir
ana balasının ölümünü istəmir”, “Sülh istəyirsən, hakimiyyəti dəyiş”,
“Əsgərlər ölür, oliqarxlar varlanır”, “Atəşkəs hakim rejimlərin
qorunmasına xidmət edir” çağırışları yazılmışdı.

“Qafqaz bölgəsində öz maraqlarını güdən Rusiya
son yüz il ərzində xalqlar arasında münaqişələr və ədavət qızışdırmaqdan
çəkinməyib. Bu gün də Ermənistan-Azərbaycan sərhədində axıdılan qan
üçün Rusiya Federasiyasının hakim rejimi və onun başçısı da məsuliyyət
daşıyır”, – deyilir fəalların bəyanatında.

Daha öncə BBC Azərbaycancaya müsahibəsində
Kremlpərəst təhlilçi Sergey Markov, Moskvanın Qarabağ müharibəsinin
qızışmasında rolu barədə iddiaları rədd edib və Rusiyanın öz cənub
qonşuluğundan müharibədə deyil, əksinə, sülhə maraqlı olduğunu qeyd edib.

Yerevanda yürüşçülər həmçinin Qarabağ
münaqişəsinin tənzimlənməsində vasitəçilik edən ATƏT-in Minsk Qrupunun
da “sərhəddə vəziyyətin mütəmadi surətdə gərginləşməsində” təqsirli
olduğunu bəyan edib.

“Minsk Qrupu tərəflərə atəşkəsi qorumaq haqqında
yazılı çağırışlardan başqa, qan axıdılmasına son qoymaq məqsədilə
konkret addımlar atmalıdır”, – nümayişçilərin bəyanatında qeyd olunur.

Yürüş iştirakçıları Ermənistan və Azərbaycan
ictimaiyyətlərini münaqişəni “xalqların təsvir etdikləri şəkildə həll
etmək üçün” birləşib ictimai müzakirələr meydanını yaratmağa çağırıblar.