Qeyri-hökumət təşkilatları üçün qara gün

Bu barədə ölkə KİV-lərinə İntiqam Əliyevin oğlu Nəcmi Əliyev məlumat verib. 

O
deyib ki, atasını səhər aparıblar, daha sonra onun telefonuna zəng
çatmayıb. Ardınca onun Saraydakı evində 10 nəfərə yaxın prokurorluq
əməkdaşı axtarış aparıb.

Nəcmi Əliyevin dediyinə görə, evə
gələn prokurorluq əməkdaşları ona axtarış aparmağa icazə ilə bağlı
məhkəmə qərarı təqdim ediblər.

Qeyd edək ki, bir müddət əvvəl İntiqam Əliyevin rəhbəri olduğu Hüquq Maarifçiliyi Cəmiyyətinin hesabına həbs qoyulub.

İntiqam
Əliyev günorta saatlarında istintaqdan çıxıb, polisin müşayiəti ilə
axtarış aparılması üçün rəhbəri olduğu Hüquq Maarifçiliyi Cəmiyyətinin
ofisinə aparılıb.

Media təmsilçiləri və bir sıra partiyaların fəalları Azadlıq prospekti 71 ünvanında yerləşən ofisin qarşısına toplaşıblar.  

Axtarış
İntiqam Əliyevin iştirakı olmadan başlayıb. Hüquq müdafiəçisi özü
ofisin qarşısında dayanan polis maşınında saxlanılıb. İntiqam Əliyevə
“təqsirləndirlən şəxs” qismində ittiham elan olunub. Bunu ofisində
axtarış aparılan zaman İntiqam Əliyev jurnalistlərə özü deyib:

“Ölkədə
insan hüquqlarını müdafiə edənləri, seçkilərin saxtalaşdırılmasına
etiraz edənləri, siyasi məhbusları müdafiə edənləri cinayətkar sayırlar.
Mən də o, “cinayətkar”lardan biriyəm. Dostlar, siz həbsdəkilərin
müdafiəsi ilə məşğul olun, mənə ehtiyac yoxdur…”

Hadisə
yerində olan müxbirimiz müsavat.com-a bildirib ki, müstəntiqin çağırışı
əsasında ofisə gələn hüquqşünas Ənnağı Hacıbəyli də axtarış aparılan
otağa buraxılmayıb. Bu barədə jurnalistlərə açıqlamasında o özü deyib:
“Axtarış aparılan otağa məni buraxmadılar. Çox qarışıqlıq idi.   

Mən
İntiqam müəllimin uşaqlıq dostuyam. Əslində ona xidmətlərinə görə
mükafat verilməlidir. Özüm də bilmirəm bu nədir –  onun başına gələnlər.
İntiqam Əliyev bu ölkənin, bu xalqın milli sərvətidir. Ona qarşı belə
hərəkətlər heç bir çərçivəyə sığmır. Ona qarşı irəli sürülən
ittihamların heç bir əsası yoxdur. Məqsəd, sadəcə, ölkədə qalan azsaylı
vətəndaş cəmiyyətinə birdəfəlik zərbə endirməkdir”. 

Ənnağı
Hacıbəylinin dediyinə görə, İntiqam Əliyev vəzifəli şəxsin
səlahiyyətlərini və qrant vəsaitini mənimsəmədə ittiham olunur: “Belə
ki, Ədliyyə Nazirliyi onun sonuncu dəfə Hüquq Maarifçiliyi Cəmiyyətinin
prezidenti seçilməsini qeydə almayıb. İddia olunur ki, guya o,
cəmiyyətin prezidentliyi vəzifəsini mənimsəyib. Bundan başqa, İntiqam
Əliyev qrant müqaviləsi imzalayıb, pul banka köçürülüb, ancaq Ədliyyə
Nazirliyi layihəni qeydə almadığına görə İntiqam müəllim o pulu heç
hesabdan çıxarmayıb da. Pul qəpiyinə qədər bankdadır. Absurd ittiham
irəli sürüblər ki, pulu mənimsəyib”.

Axtarışdan sonra İ.Əliyev Nəsimi Rayon Məhkəməsinə aparılıb. 

Məhkəmə
prosesi 1 saat yarım çəkib.  Məhkəmə binasının önündə çox saylı media
nümayəndələri və hüquq müdafiəçiləri olub. İ.Əliyevin vəkili Anar
Qasımlı media qarşısına çıxaraq bildirib ki, İntiqam Əliyevin barəsində
CM-in 3 maddəsi ilə (192, 213, 308) 3 aylıq həbs-qətimkan tədbiri
seçilib.

O deyib ki, müvəkkilinə qarşı əsas
ittiham qanunsuz sahibkarlıq, vergidən yayınma və vəzifə
səlahiyyətlərindən sui-istifadə olub. İ. Əliyevi ayrı-ayrı qrant
layihələrini qanunsuz nəğdləşdirməkdə, onları qeydiyyatdan keçirməməkdə
suçlayıblar. A. Qasımlı qeyd edib ki, bu hərəkətlər mövcud olsa belə,
cinayət məsuliyyəti yaratmır, inzibati məsuliyyət yaradır: “Bunun
qarşılığı cərimədir”. 

A.Qasımlı deyib ki,
məhkəmə prosesində İntiqam Əliyev də çıxış edib: “Onun çıxışı belə oldu:
“Mənim həbsimi sifariş ediblər, ona görə də buradayam, hakimdən də heç
bir xahişim yoxdur, bilirəm ki, ona nə deyiblərsə, edəcəklər. Mənim
həbsim bir siyasi sifarişdir, səbəbi də rejimə müxalif olan insanları
müdafiə etməm, korrupsiya və rüşvətxorluğa qarşı mübarizə aparmam,
 kompromissiz mövqe sərgiləməyimdir”. 

Vəkil deyib ki, onlar
həbsə hazır idilər, buraya gələrkən bu nəticəni gözləyirdilər. Bütün
bunlara baxmayaraq, bu qanunsuz həbsdən müvafiq qaydada şikayət
veriləcək və mübarizə beynəlxalq müstəvidə davam etdiriləcək.  

İ.Əliyevin
oğlu Nəcmi Əliyev atasının həbsinin qanunsuz olduğunu bildirdi:
“Əslində bu həbsi gözləyirdik. Atamı dörd divar arasında sındırmaq
mümkün deyil. Əsas həbs olunmaq yox, mübarizənin davam etməsidir. Biz də
sona qədər mübarizə aparacağıq”.

İntiqam Əliyev BDU-nun
hüquq fakültəsini bitirib. Hüquqşünas fəaliyyətinə 1990-cı ildən
başlayıb. 1999-cu ildən Hüquq Maarifçiliyi Cəmiyyətinin rəhbəridir. 20
ilə yaxındır ki, vəkillik fəaliyyəti ilə məşğul olur. Əsasən insan
hüquqlarının müdafiəsi sahəsində ixtisaslaşıb. Avropa İnsan Hüquqları
Məhkəməsinə 300-dən çox şikayət ünvanlayıb. 23 işi uğurla başa vurub.

Xəzər,
Qərb, Azərbaycan, Odlar Yurdu universitetlərində mülki,
mülki-prosessual, qeyri-kommersiya hüququ, insan hüquqlarının
müdafiəsinin beynəlxalq mexanizmləri fənlərindən dərs deyib.

Bir
sıra beynəlxalq qurumların (ATƏT, Avropa Şurası, GTZ və s.)
qanunvericilik və insan hüquqları məsələləri üzrə ekspertidir. 20-dən
çox kitabın müəllifidir.

2013-cü  il  martın 4-də o, “People in Need” insan haqları təşkilatının mükafatına layiq görülüb.

“Homo Homini” adlanan mükafat hər il insan haqları sahəsində fədakarlıq göstərən fəallara verilir.

***

Avqustun
8-də günün ikinci yarısında Reportyorların Azadlığı və Təhlükəsizliyi
İnstitutunun Səbayel rayonunda yerləşən ofisini də polis mühasirəyə
alıb. Polis, prokuror və vergi müfəttişləri RATİ-nin ofisində axtarış
aparmaq istəyiblər. Amma RATİ-nin əməkdaşları vəkilləri gələnə kimi
onları ofisə buraxmayıb. Polis reportaja gələn jurnalistləri  RATİ-nin
yerləşdiyi ofisin həyətindən  uzaqlaşdırmağa çalışıb. Bundan sonra
əraziyə Post-Patrul Xidmətinin əməkdaşları da  çağırılıb. Polislər
yenidən ofisə girməyə cəhd göstərsələr də RATİ-nin ofisində qalan 6
əməkdaş qapını onlara açmayıb.

Xəbəri eşidən hüquq
müdafiəçiləri Novella Cəfəroğlu və Səidə Qocamanlı RATİ-nin ofisinə
gəliblər. Lakin ərazidə polis postu qurulduğundan onları ofisin
yerləşdiyi binanın həyətinə buraxmayıblar. Baş Prokurorluğun əməkdaşları
hüquq müdafiəçilərinə məlumat verib ki, ofisdə axtarış aparılması ilə
bağlı məhkəmə qərarı var. Onlar hüquq müdafiəçilərindən xahiş ediblər
ki, ərazidən uzaqlaşsınlar və onların qanuni fəaliyyətinə mane
olmasınlar.

Hadisə ilə bağlı “Yeni Müsavat”a açıqlama verən
hüquq müdafiəçisi, Dilarə Əliyeva adına Qadın Hüquqlarının Müdafiə
Cəmiyyətinin sədri Novella Cəfəroğlu bildirib ki, bu, müstəqil QHT-lərə
 basqıdır: “Sanki bir dalğa başlayıb. Müstəqil QHT-lərə basqı edirlər.
Gəldik ki, RATİ-yə olan basqının səbəbini öyrənək. Hüquq-mühafizə
orqanlarının əməkdaşları bizi ofisin yerləşdiyi binanın həyətinə belə
buraxmadı”.

Təxminən 4 saatlıq gözləmədən
sonra polis əməkdaşları RATİ-nin ofisinə girməyi bacarıblar. Ofisdə
qalan əməkdaşlar çölə çıxarılıb və yoxlamalara başlanılıb.
Hüquq-mühafizə orqanları axtarışlarla bağlı jurnalistlərə heç bir
açıqlama verməyiblər.

Daha sonra RATİ-nin ofisinə Baş Prokurorluğun daha bir neçə əməkdaşı gəlib. 

Meydan
TV xəbər verib ki, RATİ sədrinin bank hesablarına və ölkədən çıxışına
da qadağa qoyulub. O, Respublika Prokurorluğunun Ağır Cinayətlər üzrə
İstintaq İdarəsinə aparılıb.

Virtualaz.org saytı isə xəbər
verib ki, E.Hüseynovun telefonuna zəng çatmır: “RATİ əməkdaşlarının
onunla telefon əlaqəsi yaratmaq cəhdləri saatlardır ki, nəticəsiz
qalıb”. 

Daha sonra məlumat yayıldı ki, RATİ-nin rəhbəri Emin Hüseynov saxlanılmayıb, o, ABŞ-ın Azərbaycandakı səfirliyindədir.

Axşam
saatlarında bəlli olub ki, RATİ-nin ofisində araşdırma aparan
prokurorluq əməkdaşları ofisdəki bütün kompüter və sənədləri aparıblar.
Həmçinin RATİ-nin digər ofisində də axtarış aparmağa cəhd ediblər.

ABŞ
səfirliyindən isə musavat.com-a bildirilib ki, Emin Hüseynov ABŞ
səfirliyində ümumiyyətlə olmayıb. Qəzetimiz çapa gedənə qədər onun yeri
və taleyi haqda dəqiq məlumat yox idi.

***

ATƏT-in
media azadlığı üzrə nümayəndəsi Dunya Miyatoviç Azərbaycanda azad media
fəallarına və təşkilatlarına qarşı təqiblərin intensivləşməsindən
hiddətlənib.

Avqustun 8-də yayılan press-relizdə deyilir ki,
kimliyi bilinməyən bir qrup şəxs  Reportyorların Azadlığı və
Təhlükəsizliyi İnstitutunun (RATİ) ofisinə daxil olmağa çalışdığı vaxt
Prokurorluğun nümayəndələri RATİ-nin rəhbəri Emin Hüseynovun anasının
evində axtarış aparıblar və onun anasının kompüterini aparıblar.

Avqustun
5-də isə Emin Hüseynovu Bakı Hava Limanından çıxmağa qoymayıblar.  O,
İstanbula – təcili tibbi müalicə almağa gedirdi. Onun səyahətinə niyə
qadağa qoyulduğu  izah edilməyib.

Miyatoviç
Azərbaycan hakimiyyətini medianı və azad səxsləri təqib etməyi
dayandırmağa çağırır və son vaxtlar Azərbaycanda baş verənləri
xatırladır:

“Media Hüququ İnstitutunun və onun rəhbəri Rəşid
Hacılının bank hesabları dondurulub. Ümumiyyətlə, hazırda Azərbaycanda
10-dan çox media nümayəndəsi həbsdədir”.

Miyatoviç vurğulayır ki, onlara qarşı cinayət işləri böhtan kampaniyası ilə müşayiət olunur.

Miyatoviç
Azərbaycanda ifadə azadlığının gerilədiyini bildirir və Azərbaycan
hökumətini ATƏT qarşısında götürdüyü öhdəliklərə əməl etməyə çağırır. O,
hökumətin diqqətinə çatdırır ki, jurnalistlər azad mühitdə işləyə
bilməlidir.  

Miyatoviç əmindir ki,  yaxın vaxtlarda Bakıya gələcək və onun səfəri bu məsələlərin həllinə kömək edə biləcək (AzadlıqRadiosu).