Azərbaycanda susuzluğa görə taxıl azalıb

Vahid Məhərrəmov: “İcra hakimiyyətləri indiyədək də rəqəmləri
şişirib taxıl sahəsini çox göstərirdilər ki, büdcədən subsidiya
alsınlar”

Azərbaycanda bu il 400 min ton az taxıl istehsal olunub. Bunu
“modern.az”a taxıl yığımının başa çatması haqda danışan Milli Məclisin
Aqrar siyasət komitəsinin eksperti Zahid Abbasov deyib. Onun sözlərinə
görə, məhsuldarlığın aşağı olması quraqlıqla əlaqədardır. Yəni, su
qıtlığı səbəbindən məhsuldarlığın aşağı düşməsi ümumi yığımda özünü
göstərib.

Eyni zamanda, ekspert bu halın təhlükəli olmadığını deyib. Onun fikrincə, məhsulun aşağı olması idxalı artıracaq.

Kənd təsərrüfatı sahəsi üzrə ekspert Vahid Məhərrəmov isə “Azadlıq”a açıqlamasında taxılçılıq sahəsində rəqəmlərin indiyədək
şişirdildiyini bildirib. Onun sözlərinə görə, yerli icra hakimiyyətləri
rəqəmləri şişirib taxıl sahəsini çox göstərərək, bunun müqabilində
dövlət büdcəsindən subsidiya alırlar. Ekspert həmin subsidiyanın
yerlərdə bölüşdürüldüyü barədə yetərincə məlumat və faktların olduğunu
bildirir: “Taxıl sahələrini süni şəkildə genişləndirərək, istehsalı
şişirdiblər. Bu da əvvəlki illərdə təxminən 2 milyon 900 min tondan
artıq taxıl istehsal olunduğunu göstərməyə imkan verib. Ümumiyyətlə, bu
il istehsala diqqət yetirilmədi. Çünki nazir yeni olduğu üçün başqa
işlərə diqqət elədi. Yəni, köhnə işləri qaldırmağa başı qarışdı. Amma bu
sahəyə daha çox fikir vermək lazım idi”.

“Bu gün mövcud problemləri açıb ortaya qoymaq əvəzinə, əsas fikri
yayındırırlar. Əslində, çox ciddi problem idarəetmədə və sadaladığım
digər məsələlərdədir”.

Short URL: http://www.cumhuriyyet.net/?p=10773