Neçə Qarabağ qazisi ölüm təhlükəsi ilə üz-üzədir?

Musavat.com olaraq Bakının müxtəlif rayonlarında yaşayan Qarabağ
veteranlarının yaşam şəraiti ilə maraqlanıb, problemlərini işıqlandırmaq
qərarına gəldik. 

Ölkədə daha kimlər imkansızlıq və çətin şərait ucbatından özünü
yandırmağa namizəddir? Araşdırmamız göstərdi ki, çox kiçik evlərdə,
uçuq-sökük binalarda ölüm təhlükəsi ilə üz-üzə yaşayan müharibə
veteranlarının, məcburi köçkünlərin əksəriyyəti hər an intihar həddində
çata bilərlər. 

İlk ünvanımız Yasamal rayonu, Şərifzadə küçəsində yerləşən
Azərbaycan Texniki Universitetin və İnşaat Universitetinin
yataqxanalarıdır. Məcburiyyət ucbatından burada məskunlaşan məcburi
köçkünlər hər dəqiqələrinin ölüm qorxusu ilə keçdiyini deyirlər.
Yaşadıqları binanın təhlükəsizliyindən başlamış kommunal sisteminə qədər
heç nə qaydasında deyil. Qəzalı vəziyyətdə olan binanın sakinləri
arasında azyaşlılar çoxluq təşkil edir. Sakinləri narahat edən başlıca
məsələ uşaqlarının sağlamlığı və təhlükəsizliyidir. 

Problemi işıqlandırmaqda özləri bizə bələdçilik edirlər. Vəziyyəti daha ətraflı təqdim etdiyimiz videodan izləyin. Şərhsiz.