“Hökumət düşmənin belə məğlub edib, sındıra bilmədiyi Qarabağ qazilərinin axırına çıxmaqda qərarlı görünür”

Fevralın 14-də ölkədə sosial problemlərdən dolayı intihara daha bir cəhd olub. Sumqayıtda I qrup Qarabağ əlili ev probleminə görə özünü İcra Hakimiyyətinin qarşısında yandırmaq istəyib.

AXCP sədri Əli Kərimli bu fakta münasibət bildirərək ölkə başçısını, hökuməti və parlamenti sərt şəkildə suçlayıb. O, Facebook səhifəsində yazıb:

“İlham Əliyev reallıq hissini itirib. Ölkədə hər gün maddi çətinlik altında əzilən insanlardan hansısa dözə bilməyib intihar edir. Hökumət düşmənin belə məğlub edib, sındıra bilmədiyi Qarabağ qazilərinin axırına çıxmaqda qərarlı görünür. Sumqayıt sakini, 1-ci qrup Qarabağ əlili Məcidov Malik Qardaşxan oğlu da özünü Sumqayıt şəhər İcra Hakimiyyətinin qarşısında yandıraraq intihara cəhd edib. Hökumət və parlament özünü kar və kor kimi aparır. İlham Əliyevin isə gündəmi tam başqadır. 245 milyon dollarlıq təyyarə alır, istiqlaliyyətimizə zərrə qədər aidiyyəti olmayan qayınatasına “İstiqlal” ordeni verir. Hər fürsətdə nümayiş etdirir ki, bu ölkə vətəndaşının faciələrinin ona dəxli yoxdur”.