Baş bankir məhkəmədə adının çəkilməməsi üçün çabalar göstərir

Mərkəzi Bankın rəhbəri Elman Rüstəmovun vəziyyəti ürəkaçan deyil. Vyana prosesi baş bankiri bərk təşvişə salıb. Bu barədə redaksiyamıza daxil olan məlumatlarda deyilir ki, Elman Rüstəmov bu barədə həm yerli, həm də beynəlxalq mətbuatda geniş yazılmasından narahat olaraq bəzi addımlar atmağa başlayıb.

Təbii ki, baş bankir prosesi durdura bilməyəcəyinin fərqindədir. Lakin Elman Rüstəmov ən pis halda məhkəmədə konkret olaraq onun adının hallanmasının qarşısını almaq istəyir. Artıq iki prosesdir ki, rüşvət məhkəməsində Avstryanın Mərkəzi Bankının törəmə şirkəti, banknot çapı ilə məşğul olan OeBS şirkətinin nümayəndələri Azərbaycanda əlaqədə olduğu adamların adını çəkməkdən imtina edir. Şirkətin keçmiş satış direktoru əslən Rumıniyadan olan Raluka Tanasesku ötən proseslərdə bildirib ki, o ad çəkməyə qorxur. 

Raluka Tanasesku daha sonra deyib ki, 2011-ci ildə növbəti müqavilədən OeBS şirkəti ilə azərbaycanlılar arasında razılaşdırılmış 20 faizlik haqq ödənilməyəndə onu telefonda hədələdilər. 

Qadın ifadəsində təsdiq edib ki, Azərbaycan tərəfdən rüşvəti tələb edənlər həqiqətən Mərkəzi Bankdan idilər. Razılaşdırılmış rüşvət məbləği isə müqavilənin ümumi dəyərində yer alırdı(virtualaz.org).

“Azadlıq”a daxil olan məlumata görə, Elman Rüstəmov məhz buna çalışır ki, sona qədər məhkəmə prosesində ad çəkilməsin. Çünki Tanasesku ad çəkərsə, məsələnin daha da böyüməsi şübhəsizdir.