Rəşad Mahmudov ilk olaraq şəhid ailəsinin qapısını döydü…

20.01.2020 - 19:24

77 saylı Astara seçki dairəsindən deputatlığa namizəd, tanınmış kardiocərrah, tibb doktoru, deputatlığa namizəd Rəşad Mahmudov seçiciləri ilə görüşü olub. İlk olaraq Ərçivan qəsəbəsindəki şəhid ailəsinə baş çəkən R.Mahmudov, şəhid atası Əliyev Rəziyar Mahmud oğlunun ailəsinin qonağı olub, onların yaşam şəraiti, qayğı və problemləri ilə maraqlanıb. Dövlətin bütün şəhid ailələrinə böyük qayğı göstərdiyini vurğulayan şəhid atası Rəziyar Əliyev, onların da bu qayğı və diqqəti daim öz üzərlərində hiss etdiklərini vurğulayıb.

R.Mahmudov daha sonra digər ailələrə də baş çəkib, onların qayğıları, arzu və istəkləri ilə maraqlanıb.

Xatırladaq ki, tanınmış kardiocərrah R.Mahmudov Milli Məclisin Səhiyyə Komitəsinin üzvü, Mərkəzi Gömrük Hospitalının Elmi Tədqiqat və Tədris Mərkəzinin rəisidir.

Rəşad Mahmudov 1974-cü il yanvarın 18-də də Astarada anadan olub. Səməd Vurğun adına orta məktəbi bitirən R.Mahmudov Türkiyədə “9 Sentyabr” Universitetinin tibb fakültəsində ali təhsil alıb. Daha sonra Türkiyə Ege Universitetinin ürək-damar cərrahiyəsi Elmi Mərkəzinin doktoranturasında oxuyub. 2003-cü ildə Ege Universitetində Uzmanlıq Diplomunu, 2006-cı ildə Ali Attestasiya Komisiyası tərəfindən namizədlik dissertasiyası müdafiə edib.

Bununla da tibb elmləri namizədi alimlik dərəcəsi əldə edib. 2015-cı ildə isə Ali Attestasiya Komisiyası tərəfindən doktorluq dissertasiyası müdafiə edən R.Mahmudov Tibb üzrə Elmlər Doktoru alimlik dərəcəsi alıb.

R.Mahmudov 1997-2002-ci illərdə Ege Universitetinin ürək-damar cərrahiyəsi Mərkəzində, 2003-2004-cü illərdə Şifa Xəstəxanalar Qrupunda, 2004-2005-ci illərdə İzmir şəhərindəki Kent xəstəxanasında ürək-damar cərrahı kimi fəaliyyət göstərib. 2005-ci ildən 2017-ci ilədək Mərkəzi Neftçilər Xəstəxanasının Ürək-damar cərrahiyəsi şöbəsinin müdiri və ürək-damar cərrahı kimi insanlara xidmət edən R.Mahmudov, çoxlu sayda xeyriyyə aksiyalarında iştirak edib, aztəminatlı vətəndaşların pulsuz müalicəsini həyata keçirib.

Ümumilikdə 8 min ürək əməliyyatı həyata keçirən peşəkar cərrah, bir müddət bundan öncə eyni seansda 5 yaşlı uşağın ürəyində baypass əməliyyatını və canlıdan canlıya qaraciyər transplantasiyasını gerçəkləşdirməklə dünya mediasının gündəminə çevrilmişdir.

Seymur ƏLİYEV