Bakıda qeyri-adi bina: həm məktəb, həm yataqxana…

Beşmətəbəli yataqxananın yuxarı mərtəbəsində 7 nömrəli köhnə
zavodun fəhlələri  yaşayır. Digər mərtəbələrdə isə Laçın, Kəlbəcər,
Şuşa, Zəngilandan olan məcburi köçkünlər məskunlaşıb. Sakinlər 50 ildir
ev növbəsində  olduqlarını deyirlər. 1983 -cü ildən  burada ev arzusuyla
yaşayan ailələr var.

Binanın kommunal problemləri isə yazmaqla bitməz.  Sakinlər
elektrik enerjisinin verilişində tez-tez problem yarandığını və binanın
zülmətə qərq olduğunu deyirlər. Hətta bu zaman yataqxanada oğurluq
hadisələrinin baş veridiyini iddia edənlər də var. 

Şəraitsizlikdən ən çox əziyyət çəkən isə qadınlardır. Təxminən 30
ailənin mətbəxi və  hamamı ümumidir. Biz çəkiliş apardığımız zaman da
yataqxananın dəhlizində göz -gözü görmürdü. Burada 12-15 m2-lik
otaqlarda 8-9 nəfərdən ibarət ailələr yaşayır. 

Yataqxananın sakinlərindən Nailə Kərimova həyat yoldaşının uzun
müddət zavodda işlədiyini və ev növbəsində olduğunu deyir.”O vaxt biz ev
növbəsində idik, zavodda işləyənlərə ev verəcəkdilər. Lakin artıq 40
ilə yaxındır ortada heç nə yoxdur”.

Laçın rayonundan məcburi köçkün Şəhla Nəzərova isə deyir ki,
mətbəxin ümumi olması vəziyyəti daha da çətinləşdirir: “Yemək bişirmək
üçün növbəyə dururuq. Biz özümüz birtəhər keçinirik, ancaq körpə uşaqlar
çox əziyyət çəkir. Uşağı başa salmaq olmur ki, qaz gəlmir və ya işıq
yanmır. Dəfələrlə aidiyyatı qurumlara müraciət etsəkdə heç bir
dəyişiklik yoxdur”.

Binanın ikinci mərtəbəsində isə, Laçın rayonu Müseyib Müseyibov
adına Bozulu kənd orta məktəbi yerləşir. 22 ildir yataqxanada fəaliyyət
göstərən məktəbin şəraiti ilə tanış olmaq üçün oraya da baş çəkdik. 

5 sinif otağı olan məktəbdə hazırda 37 şagird təhsil alır. 21
nəfərlik müəllim kollektivi olan məktəbdə otaqların vəziyyəti insanı
dəhşətə gətirir. 

Heç bir dərs vəsaiti, istilik sistemi olmayan kiçik sinif
 otaqları, standartalara uyğun olmayan partalar bu şəraitdə keçirilən
təhsilin keyfiyyəti ilə bağlı suallar yaradır. 

Ancaq məktəbin direktoru isə deyir ki,  şagirlərin sayının az
olmasına baxmayaraq hər il məktəbin 10 məzunundan 6-7 nəfəri yüksək
nəticə ilə ali məktəblərə qəbul olunur. : “Hər il 60 % nəticə
göstəririk. Şəraitin aşağı olması bizi həvəsdən salmır.  Müəllimlər
vaxtlı-vaxtında dərslərini keçirlər. Ümid edirk ki, bizim üçün  də
standartlara cavab verən məktəb tikiləcək”. Daha ətraflı təqdim etdiyimiz videodan izləyin.