600 minlik qalmaqallı məhkəmədə daha iki məmur dindirildi

12.01.2015 - 14:30

Dələduzluqda ittiham olunan Həsən
Əliyev, Elman Məmmədov və Taleh Süleymanovun cinayət işi üzrə növbəti
məhkəmə prosesi bu gün Gəncə Ağır Cinayətlər Məhkəməsində davam
etdirilib.

Virtualaz.org saytının prosesdə iştirak edən müxbirinin verdiyi
məlumata görə, hakim Mübariz Məmmədovun sədrliyi ilə keçirilən prosesdə
yeni şahid ifadələri dinlənildi.

Məhkəmədə şahid qismində “Azəriqaz” İstehsalat Birliyinin baş
direktorunun ümumi məsələlər üzrə müavini Ziyad Cəlilov ifadə verdi. O,
istintaqa verdiyi ifadəsini təsdiqlədi və hakimin, prokurorun,
vəkillərin suallarını cavablandırdı.

Daha sonra məhkəmə şahid qismində Nərimanov Rayon Polis İdarəsi
16-cı polis bölməsinin təhqiqatçısı Şövqi İsmayılovu dindirdi. Şövqi
İsmayılov istintaqa verdiyi ifadəyə uyğun ifadə verdikdən sonra
tərəflərin suallarını cavablandırdı.

Bundan sonra prosesdə fasilə elan olundu. Məhkəmə iclası saat 14:30-da davam edəcək.

Həsən Əliyev

Xatırladaq ki, ötən məhkəmə prosesində şahid qismində Nərimanov
Rayon Polis İdarəsi 16-cı polis bölməsinin rəisi Hikmət Usubov,
Nərimanov rayon prokurorunun sabiq I müavini Cavid Quliyev, habelə
Tariyel Haqverdiyev və Qüdrət Yəhyayev şahid ifadələri vermişdilər.

Qeyd edək ki, 2007-2014-cü illərdə Bakı Ağır Cinayətlər
Məhkəməsində hakim işləyən Həsən Əliyevin səlahiyyətlərinə ölkə başçısı
İlham Əliyevin sərəncamı ilə bu ilin fevral ayında xitam verilib.

Ramazan Səlimov

Təxminən 5 ay sonra isə uzun illər prokurorluq və məhkəmə
orqanlarında çalışan H.Əliyevə qarşı Cinayət Məcəlləsinin 178.3.2 (külli
miqdarda ziyan vurmaqla dələduzluq törətmə) və 312.2-ci (rüşvət vermə)
maddələri ilə ittiham irəli sürülüb və barəsində başqa yerə getməmək
haqqında iltizam qətimkan tədbiri seçilib.

Buna səbəb Ramazan Səlimov adlı şəxsin iddiası olub. R.Səlimov
iddia edib ki, sabiq hakim ondan vəzifəyə düzəltmək vədi ilə 600 min
manat pul alaraq qaytarmayıb.

Short URL: http://www.cumhuriyyet.net/?p=15233