Vasif Talıbovun "çanta əməliyyatı"

Son zamanlar iqtidar məmurların övladlarının dəbdəbəli həyat tərzi
haqda informasiyalar medianın gündəminin əsas mövzularına çevrilib. Kimi
dəyəri milyonlarla ölçülən bahalı avtomobillərini, kimi yaxtasını, kimi
isə Avropa restoranlarında içdikləri şampan-şərabları reklam edirlər.
Amma bu siyahının hamısı deyil… 

Ötən il mediada  Azərbaycanın neft baronlarından birinin yaxın
adamının aldığı qadın çantasına görə İstanbulun Sabiha Gökçən Hava
Limanında 15 min lirə, təxminən  7500 manat tax-free aldığı barədə xəbər
dərc edilmişdi. Xəbərdə o da deyilirdi ki, məmurun yaxın adamı həmin
çantaya  80 min türk lirəsi, (o zamankı kursla təxminən 35 min manat)
 ödəyibmiş.

Bugünlərdə Naxçıvan Ali Məclisinin sədri Vasif Talıbov da bahalı
çanta aldırtdırıb. Redaksiyamıza məlumat verən mənbənin sözlərinə görə,
V. Talıbov bunun üçün Fransaya dörd nəfər yaxın adamını göndərib.
Naxçıvandan gələnlər dünyada qadın əl çantasının ən brend istehsalçısı
olan “Hermes” firmasına müraciət ediblər. Qaynağımız deyib ki, əl işi
olan bu bahalı çantaları, sadəcə, “Hermes”in butikinə daxil olmaqla
almaq mümkün deyil. “Çünki bu firmanın çantalarını əvvəlcədən sifariş
vermək və növbəyə yazılmaq lazımdır” deyən, Avropadakı mənbəmiz
 V.Talıbovun göndərdiyi adamların sonda firma ilə anlaşdıqlarını
bildirib. Mənbənin iddiasına görə, “Hermes” yönətimi təklif edib ki,
anlaşma üçün onlar firmadan başqa mallar da (“Hermes” çantalardan əlavə
digər aksessuarlar, məsələn, bahalı dəridən hazırlanmış pul kisəsi,
ətirlər də satırlar)  alsınlar. Bunun üçün onlar mağazadan daha 30 min
avroluq alış-veriş ediblər. Alınan çantanın qiyməti isə təxminən 10 min
avro olub.

Məlumat üçün deyək ki, Terri Hermesin 1837-ci ildə təsis etdiyi
“Hermes” firması ilk dövrlərdə zəngin ailələr üçün bahalı aksessuarlar
istehsal edib. Terri Hermesin vəfatından sonra isə ailə biznesinə
çevrilən firma təxminən 1920-ci illərdə qadın çantaları işinə girişib. O
zamandan bu firmanın çantaları dünyanın ən zəngin qadınlarının istifadə
etdiyi brend marka hesab olunur.  “Hermes”in dünyanın bir çox
ölkələrində butikləri fəaliyyət göstərir. “Hermes”in malları təkcə
Avropada deyil, Amerikada da ən mod brend firmalardan biridir. Ötən il
“Hermes” moda evinin istehsalı olan timsah dərisindən hazırlanmış, qızıl
və brilyantla bəzədilmiş qırmızı çanta ABŞ-da ən baha qiymətə – 203 min
150 dollara satılmışdı. Çantanı adının açıqlanmasını istəməyən
kolleksioner alıb. Onun ödədiyi məbləğ dünyada çanta üçün verilən ən
bahalı qiymət olub. 

Sonda onu deyək ki, “Hermes”in Bakıda butiki yoxdur, yalnız Azərbaycandakı bəzi firmalarla əməkdaşlıq edirlər. 

Qarşı tərəfin də  mövqeyini dərc etməyə hazırıq.

Musavat.com