Elçin Sadıqov niyə azadlıqdadır? – Əvəz Zeynallı

27.03.2023 - 17:16

“Xural Yayınları” MMC-nin təsisçi və baş direktoru Əvəz Zeynallı və “Səda TV” MMC-də rəhbər vəzifədə işləyən Elnur Şükürovun cinayət işi üzrə məhkəmə prosesi keçirilib.

Cumhuriyyet.az xəbər verir ki, bu gün Bakı Ağır Cinayətlər Məhkəməsində hakim Əli Məmmədovun sədrliyi ilə baş tutan prosesdə təqsirləndirilən şəxslərin anket məlumatları dəqiqləşdirilib.

Əvəz Zeynallı ittihamlardan özünü təqsirli bilməyib. O, vəzifəli şəxs olmadığı halda ona rüşvət alma ittihamı verdilyini deyib.

Əvəz Zeynallının sözlərinə görə, vəkil Elçin Sadıqovla birlikdə həbs olunub: “İttiham verilib ki, mən Elçin Sadıqovla birlikdə rüşvət almışam. Amma Elçin Sadıqovun işi mənim işimdən ayrılıb və o, azadlıqdadır. Niyə o azadlıqdadı? Axı mənə ittiham onunla birlikdə verilib? Biz bir ittihamla saxlanılmışıq, həbs edilmişik”.

Daha sonra Əvəz Zeynallı məhkəmənin kiçik zalında işinə baxılmasından şikayətlənib: “Hakimdən xahiş edirəm ki, iclaslar böyük zalda keçirilsin, prosesə daha çox insan buraxılsın”.

Hakim isə bildirib ki, məsələ məhkəmə araşdırması zamanı müzakirəyə çıxarılacaq.

Daha sonra Əvəz Zeynallının vəkil Fəxrəddin Mehdiyev vəsatətlə çıxış edib. Vəkil məhkəmə proseslərində təqsirləndirilən şəxslərin şüşə qəfəsdən çıxarılmasını, müdafiəçiləri ilə yanaşı əyləşmələrinin təmin edilməsini istəyib. Vəkil bildirib ki, təqsirləndirilən şəxslərin heç biri təhlükə mənbəyi deyil.

Fəxrəddin Mehdiyev həmçinin cinayət işinə xitam verilməsi barədə vəsatət verib. O bildirib ki, təqsirləndirilən şəxslərin ittihamı əsaslı deyil.

Prokuror vəsatətlərin əsassız olduğunu deyib. Onun sözlərinə görə, sübutlar qanuni yolla əldə edilib, heç bir sübut qanunsuz deyil. Prokuror cinayət işinə xitam verilməsi ilə bağlı vəsatəti əsassız hesab edib.

Məhkəmə cinayət işinə xitam verilməsi ilə bağlı vəsatəti rədd edib.

Daha sonra Əvəz Zeynallının vəkili müvəkkilinin ev dustqlığına buraxılması ilə bağlı vəsatət verib.

Məhkəmə bu vəsatəti də rədd edib.

Sonda vəkillərin məhkəmə zalının dəyişdirilməsi ilə bağlı vəsatəti təmin edilib. Hakim bildirib ki, növbəti proses daha böyük zalda keçiriləcək.

Daha sonra prosesdə bildirilib ki, cinayət işinin təqsirləndirilən şəxs Elnur Şükürovla bağlı hissəsində Bakının Sabunçu rayon icra başçısı Adil Vəliyev, Suraxanı rayon icra başçısı Əziz Əzizov və Sumqayıt şəhər icra başçısı Zakir Fərəcov şahid qismində tanınıb.

Təqsirləndirilən şəxsin qeyd olunan icra başçılarını rüşvət verməyə təhrik etdiyi iddia olunur.

İş üzrə hazırlıq iclası başa çatıb və məhkəmənin baxış iclası aprelin 10-a təyin olunub.

Qeyd edək ki, Baş Prokurorluğun istintaq idarəsində aparılmış istintaq zamanı Əvəz Zeynallının ayrı-ayrı şəxslərdən hədə-qorxu gəlməklə, təkrar və külli miqdarda rüşvət almasına, habələ Əvəz Zeynallı və Elnur Şükürovun qabaqcadan əlbir olan bir qrup şəxs halında vəzifəli şəxslərin qərarına təsir etmək məqsədilə nüfuz alveri edərək pul almaları, xeyli miqdarda pulu dələduzluq yolu ilə ələ keçirmələri, eləcə də, digər şəxsi rüşvət verməyə təhrik etmələrinə əsaslı şübhələr müəyyən edilib.

Əvəz Zeynalova Cinayət Məcəlləsinin 178.2.1-ci (qabaqcadan əlbir olan bir qrup şəxs tərəfindən dələduzluq törətmək), 311.3.2-ci (təkrar rüşvət alma), 311.3.3-cü (külli miqdarda rüşvət alma), 311.3.4-cü (hədə-qorxu tətbiq olunmaqla rüşvət alma), 32.4, 312.2-ci (Rüşvət vermə, yəni xidməti vəzifəsinin (səlahiyyətlərinin) icrası ilə əlaqədar hər hansı hərəkətin edilməsi və ya belə hərəkətin edilməsindən imtina olunması müqabilində vəzifəli şəxsə onun özü və ya üçüncü şəxslər üçün birbaşa və ya dolayı yolla, şəxsən və ya vasitəçidən istifadə etməklə maddi və sair nemət, imtiyaz və ya güzəşt təklif olunması, vəd edilməsi və ya verilməsində iştirakçılıq) və 312-1.1-ci (vəzifəli şəxsin qərarına qanunsuz təsir göstərmə (nüfuz alveri) maddələri ilə ittiham verilib.

Digər təqsirləndirilən Elnur Şükürova isə Cinayət Məcəllənin 178.2.1, 32.4, 312.2 və 312-1.1-ci maddələri ilə ittiham elan edilib.

İş üzrə zərərçəkmiş qismində Vəliyev Ruslan Telman oğlu tanınır.

https://i0.wp.com/www.cumhuriyyet.net/wp-content/plugins/sociofluid/images/google_16.png?w=500 https://i0.wp.com/www.cumhuriyyet.net/wp-content/plugins/sociofluid/images/facebook_16.png?w=500 https://i0.wp.com/www.cumhuriyyet.net/wp-content/plugins/sociofluid/images/yahoobuzz_16.png?w=500 https://i0.wp.com/www.cumhuriyyet.net/wp-content/plugins/sociofluid/images/twitter_16.png?w=500

Short URL: http://www.cumhuriyyet.net/?p=190160

XƏBƏR LENTİ

virtual_roadi

Рейтинг@Mail.ru

Telefon:077 333 90 09
E-mail:cumhuriyyetqezeti@gmail.com;
Sayt "Yeni Cumhuriyyət" qəzetinin rəsmi internet saytıdır.
Saytın yazılarından istifadə olunan zaman istinad və yazının linkinin göstərilməsi zəruridir
Hazırladı - "QURDQANLI" DSGN

en son xeberler

May 2024
BE ÇA Ç CA C Ş B
 12345
6789101112
13141516171819
20212223242526
2728293031