İrandan səfirliyimizə terror hücumu ilə bağlı yeni açıqlama

Təəssüf ki, yanvar ayında Azərbaycanın Tehrandakı səfirliyinə hücum baş verdi. Bu gözlənilməz və acı bir hadisə idi. Ölkəmizin məhkəmə, siyasi və təhlükəsizlik orqanları da bu hücumun əsas səbəbkarları və ya hücumda əli olan digər şəxslərə qarşı qəti və qanuni şəkildə reaksiya verilməli olduğunu vurğulayırlar.
Cumhuriyyet.net xəbər verir ki, bu sözləri İranın Məhkəmə və Ədliyyə sisteminin sözçüsü Məsud Setayişi keçirdiyi mətbuat konfransında deyib.
“Geniş araşdırmalarla işin müxtəlif tərəfləri aydınlaşdırılmalı və Azərbaycan hökumətinin də əməkdaşlığı ilə hökm çıxarılmalıdır. Hələ də prosesdə eyni müttəhim var”, – o bildirib.
Qeyd edək ki, 27 yanvar 2023-cü ildə Azərbaycanın Tehrandakı səfirliyinə terror hücumu baş verib və səfirliyin təhlükəsizlik əməkdaşı qətlə yetirilib. İran terror hücumunu məişət səviyyəsində təqdim etməyə cəhd göstərərək, 5 aydır ki, yalançı araşdırma ilə əsl günahkarları gizlətməklə məşğuldur.

Short URL: http://www.cumhuriyyet.net/?p=192803