Uşaq bağçalarında da vahid geyim forması olacaq

Paytaxtda Bakı şəhər Icra Hakimiyyətinin tabeliyində olan dövlət uşaq
bağçalarına gedən azyaşlılar üçün vahid geyim formasının tətbiqinə
başlanıb.

Icra Hakimiyyətinin nəzdindəki Məktəbəqədər Təhsil Müəssisələri və
Uşaq Evləri Idarəsindən verilən məlumata görə, bu geyimlər paytaxtdakı
bütün bağçalara paylanılıb. Həmin geyimlərin uşaqların rahatlığına
xidmət etdiyi, pambıq parçadan hazırlanaraq gigiyenik tələblərə cavab
verdiyi bildirilir.

Vahid geyim formasının yay aylarında da tətbiq olunub-olunmayacağı barədə isə hələlik məlumat yoxdur.

Uşaq Hüquqlarını Müdafiə Liqasının rəhbəri Yusif Bəkirov deyir ki,
dövlət həmin geyimləri uşaqlara pulsuz paylayırsa, bunu müsbət
qarşılamaq lazımdır. Amma ailələri həmin formaları almağa məcbur etmək
yolverilməzdir: “Uşaq bağçalarında sosial vəziyyəti ağır olan ailələr
var ki, pulsuz geyim verməklə dövlət onlara müəyyən mənada, kömək etmiş
olur. Amma valideynlərə məcburi forma aldırmaq artıq doğru deyil. Bu,
sosial vəziyyəti ağır olanların vəziyyətinin daha da ağırlaşmasına
gətirib çıxara bilər. Üstəlik, xüsusi geyim formalarının mahiyyətinin
nədən ibarət olmasını aydınlaşdırmaq lazımdır. Əksər valideynlər
övladını bağçaya uşağının sosial çətinliyini həll etmək üçün qoyur ki,
övladı heç olmasa, dövlət təminatında olsun. Bu baxımdan, valideynlərə
kömək etmək əvəzinə, geyim forması aldırmaqla onların vəziyyətinin daha
da çətinləşdirilməsi düzgün deyil”.