Avtomobil biznesi də inhisara alınır
Aydın Əliyevin açıqlamasının pərdəarxası
Azərbaycan Dövlət Gömrük Komitəsi (DGK) bu ilin aprel ayından “Euro-4” ekoloji standartına keçidlə bağlı ölkəyə gətirilən avtomobillərin idxalı prosesinə münasibət bildirib.APA-nın məlumatına görə, komitə sədri Aydın Əliyev bildirib ki, DGK bu sahəyə nəzarəti gücləndirəcək.
Onun sözlərinə görə, Azərbaycanın gömrük orqanları dövlət büdcəsi qarşısında öhdəliklərini əsasən idxal vergi və rüsumları hesabına icra edir: “Lakin eyni zamanda, ölkədəki ekoloji vəziyyət də nəzərə alınmalıdır. Düşünürəm ki, bu qərar ölkədəki nəqliyyat sektorunun vəziyyəti və tıxaclarla bağlı vaxtında və düzgün atılmış bir addımdır”.Bu arada banklar avtomobillərin kreditə salınmasını məhdudlaşdırıb. Bu addımların kökündə əsasən avtomobil biznesini inhisara almaq dayanır. Azərbaycanda xeyli sayda adam Gürcüstan, Almaniya və Dubaydan avtomobil gətirib satmaqla dolanır. Bu isə əksəriyyəti məmur oliqarxlara məxsus olan Bakıdakı iri avtosalonların fəaliyyətinə zərbə vurur. Məhz həmin avtosalonlara “yaşıl işıq” yandırmaq üçün həm avtomobil idxalı, həm də maşınların kreditə salınması məhdudlaşdırılır.
Ekologiya və tıxac problemi isə sadəcə bəhanədir. Əgər söhbət ekoloji təmizlikdən gedirsə o zaman ilk növbədə yanacağın keyfiyyətinə diqqət artırılmalıdır. Tıxac probleminin həllinə gəlincə, avtomobil idxalının məhdudlaşdırılması çıxış yolu deyil. Məgər avtomobil idxalı azalsa da, Bakıdakı avtomobillərin sayı azalacaq?
Short URL: http://www.cumhuriyyet.net/?p=3567
