Novruz Bayramı ilə əlaqədar Azərbaycanda növbəti əfv sərəncamının veriləcəyi gözlənilir. Məlumata görə, artıq Əfv Komissiyasının ilk iclası da keçirilib və onlara müraciət etmiş məhbusların kimliyi və törətdiyi cinayətlərin də araşdırılmasına başlanılıb.  

Novruz əfvinə neçə nəfərin düşəcəyi və onların arasında siyasi məhbusların olub-olmayacağı isə məlum deyil. Lakin Politika.az saytının məlumatına görə, bu siyahıda keçmiş səhiyyə naziri Əli Insanovun adının olacağı ehtimalı da var. Bununla bağlı artıq keçmiş nazirlə danışıqlar aparılır. 

Qeyd edək ki, son məhkəmə proseslərində Əli Insanov Ilham Əliyev başda olmaqla bir sıra rəsmilərin ünvanına sərt ittihamlar səsləndirib. Bu çıxışların müxtəlif dairələrdə narahatlığa səbəb olması da istisna deyil. 

Saytın məlumatına görə, hakimiyyət keçmiş nazirlə razılığa gəlməyə çalışır. Ötən həftənin sonlarından etibarən Əli Insanovla hakimiyyətin müəyyən etdiyi nümayəndəsi arasında danışıqlar aparılır. Həmin danışıqlarda hökumətin tələbi keçmiş nazirin sərt çıxışlarını dayandırması, əfv ərizəsi yazması və azadlığa çıxdıqdan sonra siyasi fəaliyyətlə qəti şəkildə məşğul olmamasıdır. 

Xatırladaq ki, bundan əvvəl də Əli Insanova əfv ərizəsi yazması ilə bağlı təkliflərin verildiyi deyilirdi. Keçmiş nazir isə öz növbəsində belə bir ərizə yazmaq niyyətində olmadığını bildirirdi. Bu dəfə də belə bir anlaşmanın olacağı inandırıcı görsənməsə də, məsələni Ə.Insanovun vəkilindən dəqiqləşdirməyə çalışdıq. Vəkil Toğrul Babayev yayılan məlumatın həqiqəti əks etdirmədiyini və belə bir danışıqların olmadığını bildirdi. 

azadlıq.info

Short URL: http://www.cumhuriyyet.net/?p=4404