Əli Kərimli “od püskürdü”

“…Azərbaycan daş qazandır, çox gec qızır, amma qızandan sonra da çox gec soyuyur…”

Politika.Az xəbər portalı xəbər verir ki, bu gün AXCP sədri Əli Kərimli öz facebook səhifəsində BDU-dakı aksiya və Abel Məhərrəmovun xanım tələbəyə qarşı olan rəftarı ilə bağlı öz etirazını bildirən status paylaşıb. Həmin statusu olduğu kimi yayımlayırıq:

Bəs İlham Əliyev deyirdi ki, məmurlar xalqın xidmətçisi olacaqlar. BDU-nun rektoru Abel Məhərrəmov ona rüşvətlə bağlı sual verən şəhid qızı olan tələbəni universitetdən qovmaqla hədələdi. BDU tələbələrinin keçirdiyi etiraz aksiyasının liderlərindən biri olmuş tələbə Hüseyn Novruzovu isə rektorun şilləvuranları toplaşaraq birlikdə döydülər. Hər gün özlərini ifşa edirlər. Rektorları, icra başçıları, nazirləri hər gün bu xalqa sübut edir ki, ölkə təsadüfi adamların əlində girov qalıb.

Allah da bunların gözlərini bağlayıb. Baxırlar, ancaq görmürlər. Bunların taylarının Ukraynada necə qaçhaqaça düşdüklərini görmürlər. Bunların taylarının Misirdə, Liviyada, Suriyada, Qırğızıstanda başına gələnləri isə çox tez unutdular. Ona görə də uçuruma doğru sürətlə irəliləyirlər. Səttarxan deyirdi ki, Azərbaycan daş qazandır, çox gec qızır, amma qızandan sonra da çox gec soyuyur…(politika.az)