Ağsuda vəziyyət qarışdı

İngiltərədən göndərilmiş Rövşən Süleymanovla yerli dindarlar arasında münaqişəli vəziyyət yaranıb, icra başçısına qarşı üsyan təhlükəsi yaranıb

Ağsu rayonunda gərgin vəziyyət yaranıb. Politika.az xəbər verir ki, buna səbəb rayona İngiltərədən gələn dindarlar yerlilər arasında yaranmış münaqişəli vəziyyətdir. Bu barədə portalımıza məlumat verən yerli dindarlar deyirlər ki, problemin yaranması İngiltərədən gələn Rövşən Süleymanov adlı şəxsin atdığı addımlar olub. 

Belə ki, Qax rayonundan olan Süleymanov Ağsuda gənclərə dini dərslər keçir. Onun məhz bu bölgəyə göndərildiyi iddia edilir və İngiltərədə yaşayan Nazim Kıbrıslı adlı şeyxin tələbəsi olduğu söylənilir. Yerli dindarlar deyirlər ki, bu şəxs birbaşa İngiltərə ilə bağlı biridir, hətta Londondan onun yanına türklər gəlirlər. 

Politika.az-a məlumat verən mənbə qeyd edib ki, Rövşən Süleymanov bütün məscidləri gəzib dolaşaraq, dini təbliğatla yanaşı, siyasi təbliğatla da məşğul olur. Hətta onun konkret olaraq hakimiyyət əleyhinə kampaniya apardığı və yerli icra başçısının yarıtmaz fəaliyyətini tənqid etdiyi qeyd edilir. 

Mənbə bildirir ki, Ağsunun icra başçısı Ənvər Seyidəliyev isə vəziyyətdən çıxmaq üçün İngiltərədən gəlmiş şeyxin tələbəsini deyil, elə yerli dindarları cəzalandırmaqla məşğuldur. Səbəbini də belə göstərir ki, yerli dindarlar niyə Rövşən Süleymanova qoşulub. “Halbuki bizim onunla heç bir əlaqəmiz yoxdur. Bu adamın apardığı dini təbliğat daha çox vəhhabiliyin üzərində qurulub və olduqca təhlükəlidir. Amma biz Ağsunun icra başçısını başa sala bilmirik ki, biz ona qarşı deyilik. Üstəlik, Rövşən Süleymanova qarşı mübarizə aparacaq gücümüz də yoxdur. Bunu inzibati resursları olan qüvvə həyata keçirə bilər”. (politika.az)