Əlixan Müsayev cihad fətvası verib?

Murad Cəfərov: “Övladlarımızdan qorxuruq, onlar bunun cihad olduğunu deyib, sonna qədər mübarizə aparacaqlarını bəyan edirlər”

Bu gün redaksiyamıza elektron ünvanımız vasitəsi ilə müraciət edən Müşfiqabad qəsəbəsinin sakini Murad Cəfərov vəziyyətin heç də yaxşı olmadığını bildirib. Müraciətində M.Cəfərov yazıb ki, dünən qəsəbə məscidində qarşıdurma baş verib. Səbəb isə Dini Qurumlarla İş üzrə Dövlət Komitəsinin həmin məscidə hənəfi məzhəbinə mənsub olan birini axund təyin etməsi olub. 

Qəsəbə sakini bildirir ki, Müşfiqabad məscidi əvvəldən vəhhabilərin nəzarətində olduğundan bu təyinatla barışmayıblar. Ona görə də, yeni imamın arxasında namaz qılmaqdan imtina ediblər. Amma M.Cəfərov qorxulu olanın bu deyil, bundan sonrakı mərhələdə baş verənlər olacağını vurğulayır. 

O qeyd edib ki, yeni imamın arxasında namaz qılmaqdan imtina edən və iğtişaş salanlar polis tərəfindən saxlanılıb və şöbəyə aparılıb. “Sonra məlum oldu ki, vəhhabilərin başçısı Əlixan Musayev də onlarla birlikdə olub və fətva verib ki, təslim olmayın. Onlardan sonna qədər mübarizə aparmalarını istəyib və bunu etiqad məsələsi ilə bağlayıb. Həmin fitvada deyilir ki, qan tökülsə belə geri çəkilməyin. İndi biz neyləyək? Övladlarımıza görə, qorxuruq. Övladlarımızı sakitləşdirə bilmirik. Əlixan Musayev fətva verib deyə, uşaqlar deyirlər ki, bu artıq cihaddır və sona qədər savaşacaqlar. Xahiş edirik, bizə köməklik göstərin”.