Obama Ukraynaya yardım üçün Konqresə müraciət etdi

ABŞ Dövlət Departamentinin mətbuat katibi Cen Psaki bildirib ki, Birləşmiş Ştatların Rusiya əleyhinə sanksiyaları elan etməsi olduqca böyük ehtimaldır. Bu barədə The Guardian qəzeti yazır. “Əgər onlar indi getdikləri yola davam etsələr, biz də tədbirlər görməkdə davam edəcəyik. İndiki halda biz nəinki sanksiyaların mümkünlüyünü müzakirə edirik, hətta hazır variantlar üzərində işləyirik. Bu gün biz bu variantların tətbiq edilməsinin zəruriliyinə dünənkindən daha artıq inanırıq”- Psaki qeyd edib. 

Bu arada ABŞ prezidenti Barak Obama Konqresmenlerə müraciət edib. Obama bildirib ki, Ukraynaya yardım təklifi növbədənkənar qaydada baxılmalı və qəbul edilməlidir. “İnanıram ki, bu məsələyə heç kim partiya maraqları çərçivəsindən yanaşmayacaq”, – deyə o, qeyd edib. Obama həmçinin bildirib ki, Birləşmiş Ştatlar Rusiyanın təcrid edilməsi, onun iqtisadiyyatının çökdürülməsi üçün bir çox variantlar üzərində işləyir və əgər Rusiya tutduğu yoldan geri dönməzsə bu variantların hamısı tətbiq ediləcək. (azadliq.info)