Obama Putinə cavab verdi

ABŞ prezidenti Barak Obama rusiyalı həmkarı Vladimir Putinin Ukrayna olayları barədə açıqlamasına münasibət bildirib.

Martın 4-də mətbuat konfransı keçirən Putin Viktor Yanukoviçin Ukrayna prezidenti postundan kənarlaşdırılmasının qanunsuz olduğunu bildirib. O deyib ki, indi əlində heç bir hakimiyyət olmasa da, Yanukoviç hüquqi cəhətdən legitim prezidentdir: “Prezidentin vəzifədən götürülməsi üçün impiçment mexanizmi var. Bu prosesdə Konstitusiya Məhkəməsi, Ali Məhkəmə, parlament iştirak etməlidir. Həmin proseduraya əməl olunmayıb”.

“Media forum” saytının məlumatına görə, martın 4-ü jurnalistlərə açıqlama verən Obama Putinin qənaətinə belə münasibət bildirib: “Yəqin Putinin başqa tip hüquqşünasları var. Ola bilsin, başqa yozumlara üstünlük verir. Amma bununla kiminsə başına corab hörmək olmaz”.

ABŞ prezidenti Rusiyanın Ukraynadakı davranışının Moskvanın özünə ziyan gətirəcəyini vurğulayıb: “Rusiyanın qonşuluğundakı dövlətlər onun daxili işlərə bu cür müdaxiləsini görüb narahat olurlar. Bu amil çox ölkənin Rusiyadan uzaqlaşmasına gətirəcək”.

2013-cü il noyabrın 21-də Rusiyanın basqılarına dözməyən Ukrayna hökuməti Avropa Birliyi ilə assosiativ saziş imzalanmasına hazırlıq prosesini dayandırmaq qərarı verib. Bunun ardınca paytaxt Kiyevdə və ölkənin Qərb bölgələrində müxalifətin davamlı etiraz aksiyaları keçirilib. Zaman-zaman toqquşmalar olub və ümumilikdə 98 nəfər ölüb. Fevralın 22-də hakimiyyət Qərb meylli qüvvələrin əlinə keçəndən sonra isə Rusiya ölkənin cənub-şərq bölgəsində Moskvaya bağlı qüvvələri onların üstünə qaldırıb və Krım Muxtar Respublikasını hərbi qüvvə ilə işğal edib.