Bakı metrosunda kəskin qoxu müəmması: Metropolitendən reaksiya gəldi

Bu gün səhər saatlarından başlayaraq Bakı Metropolitenində kəskin qoxu hiss edilməyə başlayıb. Xüsusilə də metronun “Xalqlar dostluğu”-“Neftçilər” stansiyalarının tunelində nəfəs almağı belə çətinləşdirən bu qoxunun səbəbinin nə olduğunu dəqiqləşdirmək mümkün olmayıb. 

Sərnişinlərin bəziləri bunun kimyəvi maddənin qoxusu olduğunu, digərləri isə kanalizasiya sularının metro tunelinə axıdılmasından yarandığını iddia edirdilər. Qısa müddət ərzində kəskin qoxu “Koroğlu” stansiyasına qədər yayılıb və hətta metrostansiyaların giriş-çıxış hissələrində də nəfəs almaq çətinləşib. Bu hadisənin metro ticarətçilərinin aksiya keçirdiyi saatlara təsadüf etməsi isə suallar doğurub. 

Məsələ ilə bağlı Bakı Metropoliteninin mövqeyini öyrənmək istədik. Yalnız günün ikinci yarısında qurumun xanım əməkdaşı suallarımızı ümumi şəkildə aşağıdakı kimi cavablandırdı: “Artıq şaxtada vintlyasiya sistemi işləyir, heç bir problem yoxdur. Narahat olmayın”. Metropoliten işçisi qoxunun hansı səbəblərdən yarandığını isə açıqlamadı.