Nurçular 53 milyon dolları Azərbaycandan çıxarmağa çalışırlar

Fətullah Gülənə çatacaq həmin məbləğin Balakən Gömrük Məntəqəsi ilə çıxarılacağı ehtimal edilir 

Son dövrlər ölkədə nurçuların fəaliyyəti və onların maliyyə mənbəyi ilə bağlı çeşidli məlumatlar yayılır. Dünən onlardan daha biri Politika.az-a çatıb. Həmin məlumatda deyilir ki, Azərbaycanda qərarlaşmış nurçuların liderləri Fətullah Gülənə göndərdiyi maliyyə hesabatı sənədi üzə çıxdıqdan sonra düşərgədə qarışıqlıq yaranıb. Məlumatda vurğulanır ki, nurçular əllərində olan 53 milyon dolların qalan hissəsini Türkiyədə vəziyyət qarışıq olduğundan ora göndərə bilmirlər. Qeyd olunur ki, həmin pulun qalan hissəsi şirkətlərin kassalarında saxlanılırmış. Lakin Vergilər və Maliyyə Nazirliyinin məsələdən xəbər tutaraq, yoxlamalara start verməsi onları tədbirli davranmağa vadar edib. Üstəlik, bu məlumatın nurçuların dövlətdəki adamları tərəfindən sızdırıldığı qeyd olunur. Mənbə Politika.az-a yazdığı məktubunda vurğulayır ki, məsələdən xəbər tutulan kimi gecə saatlarında firmadan pulları çıxararaq, naməlum istiqamətdə aparıblar. “Ehtimal var ki, həmin pulu Balakən gömrük postu vasitəsi ilə ölkədən çıxarıcaqlar”.