Uşaq bağçalarında ət niyə yoxa çıxır?

Standartlaşdırma, Metrologiya və Patent üzrə Dövlət Komitəsi Cəlilabaddakı uşaq bağçalarında yoxlamalar aparıb.

Komitənin mətbuat xidmətindən virtualaz.org saytına bildiriblər ki, rayonun Heydər Əliyev prospektindəki 1 və 3 saylı körpələr evi-uşaq bağçalarında yoxlamalar zamanı anbarlarda ərzaq məhsullarının saxlanma rejiminə əməl olunmadığı aşkarlanıb.

Bəlli olub ki, hazırlanan yeməklərin kalorilik, zülal, yağ və karbohidratların miqdarı tibb işçisi tərəfindən hesablanmadan uşaqlara verilir. AZS 747-2013 standartının tələblərinə uyğun olaraq gündəlik qida rasionuna ət daxil edilməli olduğu halda 3 saylı uşaq bağçasında hazırlanan yeməklərin içərisinə ət qatılmır.  Həmçinin bağçalarda təsdiq edilmiş menyunun olmadığı, yeməklərin texnoloji təlimat və reseptura olmadan hazırlandığı, yuma əməliyyatının mətbəxdə aparıldığı müəyyən edilib. Bundan başqa yeməklərin hazırlanması zamanı istifadə olunan xammalların uyğunluq və gigiyenik sertifikatları, 1 saylı uşaq bağçasında isə istifadə olunan ət məhsullarının baytarlıq şəhadətnamələri yoxlamaya təqdim olunmayıb.